ഇന്ത്യൻ ജാവലിൻ ത്രോയിൽ ശ്രദ്ധേയമായ മുന്നേറ്റം തുടരുന്ന സച്ചിൻ യാദവ് 83.86 മീറ്റർ ദൂരം എറിഞ്ഞ് ഫെഡറേഷൻ കപ്പ് 2025ൽ സ്വർണം നേടി. ഏപ്രിൽ 21ന് നടന്ന മത്സരത്തിൽ ഉത്തർപ്രദേശിൽ നിന്നുള്ള 25 കാരനായ യാദവ് ഏഷ്യൻ ഗെയിംസ് വെള്ളി മെഡൽ ജേതാവായ കിഷോർ കുമാർ ജെനയെ പിന്തള്ളി. ജെന നാലാം സ്ഥാനത്താണ് എത്തിയത്. യാദവിന്റെ മികച്ച പ്രകടനം അഞ്ചാം റൗണ്ടിലായിരുന്നു.
മത്സരത്തിലുടനീളം സ്ഥിരത പുലർത്തിയ അദ്ദേഹം ഒരു തവണ പോലും ഫൗൾ വരുത്തിയില്ല. യഷ്വീർ സിംഗ് 80.85 മീറ്ററുമായി രണ്ടാം സ്ഥാനത്തും സാഹിൽ സിൽവാൾ 77.84 മീറ്ററുമായി മൂന്നാം സ്ഥാനത്തും എത്തി. ജെനയുടെ മികച്ച ദൂരം 77.82 മീറ്ററായിരുന്നു.
ഫെബ്രുവരിയിൽ നടന്ന 38-ാമത് ദേശീയ ഗെയിംസിൽ 84.39 മീറ്റർ എന്ന വ്യക്തിഗത മികച്ച ദൂരത്തോടെ സ്വർണം നേടിയതിന് പിന്നാലെയാണ് ഈ വിജയം. ഈ നേട്ടത്തോടെ, എക്കാലത്തെയും മികച്ച ഇന്ത്യൻ ജാവലിൻ ത്രോയിൽ അഞ്ചാം സ്ഥാനത്തേക്ക് സച്ചിൻ ഉയർന്നു.