പോയിന്റുകള്‍ക്ക് പഞ്ഞം, പുനേരി പള്‍ട്ടനെ വീഴ്ത്തി തെലുഗു ടൈറ്റന്‍സ്

- Advertisement -

ഇന്ന് നടന്ന ആദ്യ പ്രൊ കബഡി ലീഗ് മത്സരത്തില്‍ പുനേരി പള്‍ട്ടന്റെ ചെറുത്ത് നില്പിനെ മറികടന്ന് തെലുഗു ടൈറ്റന്‍സിനു വിജയം. 28-25 എന്ന സ്കോറിനാണ് ടൈറ്റന്‍സിന്റെ വിജയം. പോയിന്റുകള്‍ അത്ര കണ്ട് പിറക്കാത്ത മത്സരത്തില്‍ ഒരു ഘട്ടത്തില്‍ 27-20നു ടൈറ്റന്‍സ് ലീഡ് ചെയ്തുവെങ്കിലും അവസാന നിമിഷങ്ങളിലെ മികവില്‍ ലീഡ് നില കുറയ്ക്കുവാന്‍ പൂനെയ്ക്ക് സാധിച്ചു. എന്നാല്‍ അവസാന നിമിഷ വെല്ലുവിളിയെ അതിജീവിച്ച് തെലുഗു ടൈറ്റന്‍സ് വിജയം ഉറപ്പാക്കുകയായിരുന്നു. പകുതി സമയത്ത് 17-11നു വ്യക്തമായ ലീഡ് കൈവശപ്പെടുത്തുവാന്‍ ടൈറ്റന്‍സിനു സാധിച്ചിരുന്നു.

റെയിഡിംഗില്‍ 14-12 എന്ന സ്കോറിനും പ്രതിരോധത്തില്‍ 10-9 എന്ന സ്കോറിനും ടൈറ്റന്‍സ് ആണ് മുന്നില്‍ നിന്നത്. രണ്ട് തവണ മത്സരത്തില്‍ പൂനെ ഓള്‍ഔട്ട് ആയപ്പോള്‍ തെലുഗു ഒരു തവണ ഓള്‍ഔട്ട് ആയി. മത്സരത്തില്‍ 2 അധിക പോയിന്റ് പൂനെയ്ക്ക് സ്വന്തമാക്കുവാനായിരുന്നു.

8 പോയിന്റ് നേടിയ രാഹുല്‍ ചൗധരി മത്സരത്തിലെ ടോപ് സ്കോറര്‍ ആയപ്പോള്‍ നിലേഷ് സാലുങ്കേ(6), ക്രുഷ്ണ മഡാനേ(4) എന്നിവരും രാഹുലിനൊപ്പം തെലുഗു ടീമിനു വേണ്ടി തിളങ്ങി. പൂനെ നിരയില്‍ ഏഴ് പോയിന്റുമായി സന്ദീപ് നര്‍വാലും 5 പോയിന്റ് നേടിയ അക്ഷയ് ജാഥവുമാണ് തിളങ്ങിയ താരങ്ങള്‍.

Advertisement