പാന്തേഴ്സിനെ കീഴടക്കി പൈറേറ്റ്സ്, ജയം 11 പോയിന്റിനു

ജയ്പൂര്‍ പിങ്ക് പാന്തേഴ്സിനെ 41-30 എന്ന സ്കോറിനു പരാജയപ്പെടുത്തി നിലവിലെ ചാമ്പ്യന്മാരായ പട്ന പൈറേറ്റ്സ്. ഇന്ന് നടന്ന ആദ്യ മത്സരത്തില്‍ 11 പോയിന്റ് ജയമാണ് പൈറേറ്റ്സ് സ്വന്തമാക്കിയത്. 22-15നു മുന്നിലായിരുന്ന പട്ന രണ്ടാം പകുതിയില്‍ മുന്നേറി ജയം സ്വന്തമാക്കുകയായിരുന്നു. 11 പോയിന്റ് നേടിയ പര്‍ദീപ് നര്‍വാളിനൊപ്പം മഞ്ജീത്ത്(10) വികാസ് കാലെ(5), ജയദീപ്(5) എന്നിവര്‍ തിളങ്ങിയപ്പോളാണ് പാന്തേഴ്സിനെ അനായാസമായി കീഴടക്കുവാന്‍ പട്നയ്ക്കായത്.

പാന്തേഴ്സിനായി ദീപക് ഹൂഡയും അനൂപ് കുമാറും 8 വീതം പോയിന്റ് നേടി. റെയിഡിംഗില്‍ ഇരു ടീമുകളും 22 പോയിന്റ് വീതം നേടി തുല്യത പാലിച്ചപ്പോള്‍ പ്രതിരോധത്തില്‍ 14-8നു പട്ന മുന്നില്‍ നിന്നു. രണ്ട് തവണ പാന്തേഴ്സിനെ ഓള്‍ഔട്ട് ആക്കിയ വഴി പട്ന 4 ഓള്‍ഔട്ട് പോയിന്റും സ്വന്തമാക്കി.