പ്രൊ കബഡി സീസണിലെ ഏറ്റവും വലിയ വിജയം നേടി യു മുംബ. 53-26 പോയിന്റ് വ്യത്യാസത്തിലാണ് ഇന്ന് ടീം ഹരിയാന സ്റ്റീലേഴ്സിനെ തകര്‍ത്ത് വിട്ടത്. ആദ്യ പകുതിയില്‍ 27-15ന്റെ ലീഡ് സ്വന്തമാക്കിയ മുംബൈ രണ്ടാം പകുതിയില്‍ കൂടുതല്‍ മെച്ചപ്പെട്ട പ്രകടനം പുറത്തെടുത്തു. രണ്ടാം പകുതിയില്‍ ഹരിയാന 11 പോയിന്റ്സ് നേടിയപ്പോള്‍ മുംബൈ 26 പോയിന്റാണ് നേടിയത്. ഈ സീസണില്‍ ആദ്യമായി 50 പോയിന്റ് കടക്കുന്ന ടീമായും മുംബൈ മാറി.
മുംബൈയ്ക്കായി അഭിഷേക് സിംഗ് 14 പോയിന്റും രോഹിത് ബലിയാന്‍, സിദ്ധാര്‍ത്ഥ് ദേശായി എന്നിവര്‍ എട്ട് പോയിന്റും ഫസല്‍ അത്രച്ചാലി 7 പോയിന്റും നേടി മികവ് പുലര്‍ത്തി. 9 പോയിന്റ് നേടിയ വികാസ് ഖണ്ഡോലയാണ് ഹരിയാനയുടെ ടോപ് സ്കോറര്‍.
29 റെയിഡ് പോയിന്റുകള്‍ മുംബൈ നേടിയപ്പോള്‍ ഹരിയാന 19 പോയിന്റാണ് നേടിയത്. 4 തവണയാണ് ഹരിയാന മത്സരത്തില്‍ ഓള്‍ഔട്ട് ആയത്. ആ വകുപ്പില്‍ 8 പോയിന്റ് മുംബൈയ്ക്ക് ലഭിച്ചു. 15 ടാക്കിള്‍ പോയിന്റ് മുംബൈ നേടിയപ്പോള്‍ വെറും അഞ്ച് പോയിന്റാണ് ഈ വിഭാഗത്തില്‍ നിന്ന് ഹരിയാന സ്വന്തമാക്കിയത്.
