കോമൺവെൽത്ത് ഗെയിംസ് വനിത ഹോക്കിയിൽ സെമിയിൽ പുറത്തായി ഇന്ത്യ. മൂന്ന് വട്ടം ഒളിമ്പിക്സ് ചാമ്പ്യന്മാരായ ഓസ്ട്രേലിയയോട് ഷൂട്ടൗട്ടിലാണ് ഇന്ത്യയുടെ തോൽവി. നിശ്ചിത സമയത്ത് 1-1 എന്ന സ്കോറിന് ഇരു ടീമുകളും സമനിലയിൽ പിരിയുകയായിരുന്നു.
ആദ്യ ക്വാര്ട്ടറിൽ ഓസ്ട്രേലിയ റെബേക്ക ഗ്രെയ്നറുടെ ഗോളിൽ മുന്നിലെത്തിയപ്പോള് അവസാന ക്വാര്ട്ടറിൽ ഇന്ത്യയ്ക്കായി നിശ്ചിത സമയത്ത് വന്ദന കട്ടാരിയ ആണ് ഗോള് നേടിയത്. പത്താം മിനുട്ടിൽ ഓസ്ട്രേലിയ ഗോള് നേടിയപ്പോള് ഇന്ത്യ ഗോള് മടക്കിയത് 49ാം മിനുട്ടിലാണ്.
അവസാന മിനുട്ടുകളിൽ ഓസ്ട്രേലിയയുടെ കടുത്ത ആക്രമണങ്ങളെ സവിത തടഞ്ഞപ്പോള് മത്സരം ഷൂട്ടൗട്ടിലേക്ക് നീങ്ങി. ഷൂട്ടൗട്ടിൽ 3-0 എന്ന സ്കോറിന് ഇന്ത്യ പിന്നിൽ പോയി.
