നിലവിലെ ലോക ചാമ്പ്യനെ അട്ടിമറിച്ച് ഇന്ത്യയുടെ പൂജ റാണി, സ്വര്‍ണ്ണ മെഡല്‍

ഏഷ്യന്‍ ബോക്സിംഗ് ചാമ്പ്യന്‍ഷിപ്പില്‍ ഇന്ത്യയുടെ പൂജ റാണിയ്ക്ക് സ്വര്‍ണ്ണ മെഡല്‍. ചൈനയുടെ വാംഗ് ലിനയെ പരാജയപ്പെടുത്തിയാണ് 81 കിലോ വിഭാഗത്തില്‍ പൂജ ജേതാവായത്. നിലവിലെ ലോക ചാമ്പ്യന്‍ കൂടിയാണ് ചൈനീസ് താരം. അതേ സമയം ഇന്ത്യയുടെ സിമ്രന്‍ജിത്ത് കൗര്‍ 64 കിലോ വിഭാഗത്തില്‍ ലോക ചാമ്പ്യനായ ഡൗ ഡാനിനോട് പൊരുതി തോല്‍ക്കുകയായിരുന്നു. കഴിഞ്ഞ തവണത്തെ ലോക ചാമ്പ്യന്‍ഷിപ്പ് മത്സരത്തില്‍ ചൈനയുടെ ഡൗവിനോട് സിമ്രന്‍ജിത്ത് ഫൈനലിലാണ് പരാജയമേറ്റു വാങ്ങിയത്.

അതേ സമയം ചാമ്പ്യന്‍ഷിപ്പിലെ ആദ്യ സ്വര്‍ണ്ണം ഇന്ത്യ നേടിയത് അമിത് പംഗലിന്റെ സ്വര്‍ണ്ണ നേട്ടത്തിലൂടെയായിരുന്നു. കഴിഞ്ഞ ഏഷ്യന്‍ ഗെയിംസ് സ്വര്‍ണ്ണ മെഡല്‍ ജേതാവ് കൂടിയായ അമിത് 52 കിലോ വിഭാഗത്തിലാണ് സ്വര്‍ണ്ണം കരസ്ഥമാക്കിയത്.