തോല്‍വിയുടെ പിടിയിൽ നിന്ന് രക്ഷപ്പെട്ട് തോമസ് കപ്പ് സെമി ഫൈനലില്‍ കടന്ന് ഡെന്മാര്‍ക്ക്. ഇന്നലെ നടന്ന നാലാം ക്വാര്‍ട്ടര്‍ ഫൈനലിൽ കൊറിയയുടെ കടുത്ത വെല്ലുവിളി അതിജീവിച്ചാണ് 3-2 എന്ന രീതിയിൽ വിജയം ടീം പിടിച്ചെടുത്തത്. നാലാം മത്സരത്തിൽ മൂന്ന് മാച്ച് പോയിന്റുകള്‍ രക്ഷിച്ചാണ് മത്സരത്തിൽ സജീവമായി ഡെന്മാര്‍ക്ക് നിന്നത്.
ആദ്യ മത്സരത്തിൽ വിക്ടര്‍ അക്സല്‍സെന്‍ 2-1 എന്ന സ്കോറിന് വിജയിച്ചപ്പോള്‍ ആദ്യ ഡബിള്‍സിലും മൂന്നാം സിംഗിള്‍സിലും കൊറിയയ്ക്കായിരുന്നു വിജയം. നാലാമത്തെ മത്സരമായ രണ്ടാം ഡബിള്‍സിൽ ടീം ആദ്യ സെറ്റ് കൈവിടുകയും രണ്ടാം സെറ്റിൽ 17-20ന് പിന്നിലായിരുന്നുവെങ്കിലും അവിടെ നിന്ന് സെറ്റ് 23-21ന് വിജയിച്ച് അടുത്ത സെറ്റും നേടി 2-2ന് മത്സരത്തിൽ ഒപ്പമെത്തി.
അവസാന മത്സരത്തിൽ നേരിട്ടുള്ള ഗെയിമിൽ ഡെന്മാര്‍ക്ക് താരം റാസ്മസ് ഗെംകേ വിജയിച്ചപ്പോള്‍ ഇന്ത്യയ്ക്കെതിരെ സെമി സ്ഥാനം ടീം ഉറപ്പിക്കുകയായിരുന്നു. രണ്ടാം സെമിയിൽ ഇന്തോനേഷ്യും ജപ്പാനും ഏറ്റുമുട്ടും.
