കോമൺവെൽത്ത് ഗെയിംസിൽ പുരുഷ ബാഡ്മിന്റൺ സിംഗിൾസിൽ സെമിഫൈനലിലേക്ക് മുന്നേറി ഇന്ത്യയുടെ കിഡമ്പി ശ്രീകാന്തും ലക്ഷ്യ സെനും. ഇംഗ്ലണ്ടിന്റെ ഇടൻ കയ്യൻ ടോബി പെന്റിയോട് മികച്ച പോരാട്ടം ജയിച്ചാണ് ശ്രീകാന്ത് സെമിയിലേക്ക് മുന്നേറിയത്. 21-19, 21-17 എന്ന സ്കോറിന് ആയിരുന്നു ശ്രീകാന്ത് ജയം കണ്ടത്.
മിക്സഡ് ടീം ഫൈനലിൽ തന്നെ തോൽപ്പിച്ച മലേഷ്യയുടെ സെ യങ് ആണ് ശ്രീകാന്തിന്റെ സെമിയിലെ എതിരാളി. അതേസമയം അനായാസ ജയം ആണ് ക്വാർട്ടർ ഫൈനലിൽ 20 കാരനായ ലക്ഷ്യ സെൻ കുറിച്ചത്. മൊറീഷ്യസ് താരം ജൂലിയൻ ജോർജസ് പോളിനെ 21-12, 21-11 എന്ന സ്കോറിന് സെൻ തകർത്തു വിട്ടു. സെമി ഫൈനലിൽ സിംഗപ്പൂർ താരം ജിയ ഹെങ് ടെയിയെ ആണ് സെൻ നേരിടുക.