ഏഷ്യൻ ഗെയിംസിൽ ഇന്ത്യക്ക് ഒരു സ്വർണ്ണം കൂടെ. വനിതകളുടെ ജാവലിൻ ത്രോയിൽ അന്നു റാണിയാണ് ഇന്ത്യക്ക് സ്വർണ്ണം നേടിക്കൊടുത്തത്. ചരിത്രത്തിൽ ആദ്യമായാണ് വനിതാ ജാവലിൻ ത്രോയിൽ ഇന്ത്യ ഏഷ്യൻ ഗെയിംസ് സ്വർണ്ണം നേടുന്നത്. 62.92 മീറ്റർ എറിഞ്ഞായിരുന്നു സ്വർണ്ണം. ഈ സീസണിലെ അന്നു റാണിയുടെ ഏറ്റവും മികച്ച ത്രോയാണ് ഇത്.
ഈ സീസണിൽ ഇതുവരെ 60 മീറ്റർ ദൂരം എറിയാൻ കഴിയാതെ മോശം ഫോമിൽ ആയിരുന്നു അന്നു റാണി. ഏറ്റവും നിർണായക സമയത്ത് തന്നെ ഫോമിലേക്ക് ഉയർന്ന് ഇന്ത്യക്ക് സ്വർണ്ണം നൽകാൻ അവർക്ക് ഇന്ന് ആയി. ഇന്ത്യയുടെ ഈ ഏഷ്യൻ ഗെയിംസിലെ പതിനഞ്ചാം സ്വർണ്ണമാണിത്. അന്നു റാണിക്ക് ഇത് അവരുടെ കരിയറിലെ രണ്ടാം ഏഷ്യാഡ് മെഡലുമാണ്.