വനിത സൂപ്പർ ലീഗിൽ തുടർച്ചയായ നാലാം മത്സരത്തിലും ജയം കണ്ടു ആഴ്സണൽ. ലിവർപൂൾ വനിതകളെ എതിരില്ലാത്ത രണ്ടു ഗോളുകൾക്ക് ആണ് ആഴ്സണൽ വനിതകൾ തോൽപ്പിച്ചത്. ജയത്തോടെ ലീഗിൽ അവർ ഒന്നാമത് തുടരുകയാണ്. അതേസമയം ആദ്യ മത്സരത്തിൽ ചെൽസിയെ അട്ടിമറിച്ച ശേഷം ബാക്കി മത്സരങ്ങൾ എല്ലാം ലിവർപൂൾ വനിതകൾ തോറ്റു. ചാമ്പ്യൻസ് ലീഗിൽ ലിയോണിന് എതിരായ ചരിത്രജയത്തിന് ശേഷം പ്രമുഖ താരങ്ങൾക്ക് വിശ്രമം നൽകിയാണ് ആഴ്സണൽ ഇറങ്ങിയത്.
മത്സരത്തിൽ ആഴ്സണലിന്റെ ആധിപത്യം തന്നെയാണ് കാണാൻ സാധിച്ചത്. ആദ്യ പകുതിയുടെ തുടക്കത്തിൽ തന്നെ നേടിയ ഗോളുകൾ ആണ് ആഴ്സണലിന്റെ ജയം ഉറപ്പാക്കിയത്. മത്സരത്തിൽ പതിനഞ്ചാമത്തെ മിനിറ്റിൽ ലിയ വാൽറ്റി ആഴ്സണലിന് മുൻതൂക്കം സമ്മാനിച്ചു. 7 മിനിറ്റുകൾക്ക് ശേഷം കാറ്റലിൻ ഫോർഡിന്റെ പാസിൽ നിന്നു ഗോൾ കണ്ടത്തിയ ഫ്രിദ മാനം ആഴ്സണലിന്റെ ജയം ഉറപ്പിക്കുക ആയിരുന്നു.
