ഫുട്ബോളിൽ നിന്നു വിരമിക്കൽ പ്രഖ്യാപിച്ചു അമേരിക്കൻ ഇതിഹാസതാരം മേഗൻ റപീനോ. ഈ വരുന്ന ലോകകപ്പ് തന്റെ അവസാന ലോകകപ്പ് ആണ് എന്ന് പ്രഖ്യാപിച്ച 38 കാരിയായ താരം ഈ യു.എസ് ലീഗ് സീസണിനു ശേഷം താൻ വിരമിക്കും എന്നും കൂട്ടിച്ചേർത്തു. ഒക്ടോബർ 6 നു നടക്കുന്ന ഒ.എൽ റെയിന് ആയുള്ള അവസാന ലീഗ് മത്സരം അപ്പോൾ താരത്തിന്റെ അവസാന മത്സരം ആവും.
ലോക ഫുട്ബോളിലെ ഏറ്റവും മികച്ച താരങ്ങളിൽ ഒരാൾ ആയാണ് റപീനോ പരിഗണിക്കപ്പെടുന്നത്. 199 തവണ അമേരിക്കക്ക് ആയി കളിച്ച താരം ഒരു തവണ ഒളിമ്പിക് സ്വർണവും 2 ലോകകപ്പുകളും നേടിയിട്ടുണ്ട്. 2019 ലോകകപ്പിൽ ടൂർണമെന്റിലെ മികച്ച താരവും ടോപ്പ് സ്കോററും ആയി അമേരിക്കക്ക് ലോകകപ്പ് സമ്മാനിച്ചത് റപീനോ ആയിരുന്നു. ആ വർഷത്തെ ബാലൻ ഡിയോറും റപീനോ ആണ് നേടിയത്. തന്റെ ശക്തമായ മനുഷ്യാവകാശ രാഷ്ട്രീയ നിലപാടുകൾ കൊണ്ടും റപീനോ പ്രശസ്തയാണ്.