വനിത ചാമ്പ്യൻസ് ലീഗ് ആദ്യ പാദ സെമിഫൈനലിൽ ചെൽസിയെ എതിരില്ലാത്ത ഒരു ഗോളിന് മറികടന്നു ബാഴ്‌സലോണ വനിതകൾ. ചെൽസിയുടെ സ്റ്റാഫോർഡ് ബ്രിഡ്ജിൽ നടന്ന മത്സരത്തിൽ ബാഴ്‌സലോണയുടെ വലിയ ആധിപത്യം ആണ് കാണാൻ ആയത്. മത്സരത്തിന്റെ നാലാം മിനിറ്റിൽ തന്നെ ഗെയ്സെ ഫെരേയ്രയുടെ പാസിൽ നിന്നു കരോളിൻ ഹാൻസൻ ആണ് ബാഴ്‌സലോണയുടെ ഗോൾ നേടിയത്.
ബോക്സിനു പുറത്ത് നിന്ന് അതുഗ്രൻ ഇടത് കാലൻ അടിയിലൂടെ ആണ് ഹാൻസൻ തന്റെ ഗോൾ നേടിയത്. തുടർന്ന് സമനിലക്ക് ആയുള്ള ശ്രമത്തിൽ ആദ്യ പകുതിയിൽ ചെൽസി ഒരിക്കൽ വല കുലുക്കിയെങ്കിലും ഗോൾ ഓഫ് സൈഡ് കാരണം നിഷേധിക്കപ്പെട്ടു. തുടർന്നും അവസരങ്ങൾ ഉണ്ടാക്കിയെങ്കിലും ബാഴ്‌സക്ക് അത് മുതലാക്കാൻ ആയില്ല. ഏപ്രിൽ 27 നു നടക്കുന്ന രണ്ടാം പാദത്തിലും ജയിച്ചു മറ്റൊരു ചാമ്പ്യൻസ് ലീഗ് ഫൈനൽ ആവും ബാഴ്‌സലോണ വനിതകൾ ലക്ഷ്യം വക്കുക, അതേസമയം തിരിച്ചു വരാൻ ആവും ചെൽസി ശ്രമം.
