വിരാട് കോഹ്ലി 2024ലെ ടി20 ലോകകപ്പ് ടീമിലും ഉണ്ടാകണം എന്ന് സഞ്ജയ് ബംഗാർ. കോഹ്ലിയുടെ അനുഭവപരിചയവും സമ്മർദ്ദം മറികടക്കാനുള്ള കഴിവും വെസ്റ്റ് ഇൻഡീസിലും യുഎസിലും നടക്കുന്ന ഐസിസി ടി20 ലോകകപ്പിൽ നിർണായകമാകും എന്ന് ബംഗാർ പറയുന്നു. ഇന്ത്യൻ ടീമിന്റെ ഒഴിച്ചുകൂടാനാവാത്ത ഭാഗമാണ് കോഹ്ലി എന്നും മുൻ ഇന്ത്യൻ ബാറ്റിംഗ് കോച്ച് സഞ്ജയ് ബംഗാർ വിശ്വസിക്കുന്നു.
“നൂറു ശതമാനം കോഹ്ലി ടി20 ലോകകപ്പിൽ ഉണ്ടാകണം, കഴിഞ്ഞ ടി20 ലോകകപ്പിലും ആ അടുത്ത മത്സരങ്ങളിലും അദ്ദേഹം ചെയ്തത് അദ്ദേഹത്തിന്റെ മികവ് കാണിക്കുന്നു. അടുത്ത വർഷത്തെ ടി20 ലോകകപ്പിൽ അദ്ദേഹത്തെ കളിപ്പിക്കാതിരിക്കാനുള്ള കാരണം ഞാൻ കാണുന്നില്ല.” ബംഗാർ പറഞ്ഞു.
“വികാരങ്ങൾ ഉയർന്നുനിൽക്കുന്ന വലിയ സാഹചര്യങ്ങളിൽ, ഒരു ചെറിയ പിഴവിന് നിങ്ങൾ വലിയ വില നൽകുമെന്ന് നിങ്ങൾക്കറിയാം. അത്തരം സാഹചര്യങ്ങളിലൂടെ കടന്നുപോയ വലിയ കളിക്കാർ നിങ്ങൾക്ക് എപ്പോഴും ആവശ്യമാണ്. ആ സമയത്ത്, നിങ്ങളുടെ സ്ട്രൈക്ക് റേറ്റ് എന്താണെന്ന് ഉള്ളത് നിങ്ങൾ കാര്യമാക്കേണ്ടതില്ല.” ബംഗാർ പറഞ്ഞു.