പി.എസ്.ജി താരം അഡ്രിയാൻ റാബിയോ ഇറ്റാലിയൻ വമ്പന്മാരായ യുവന്റസിൽ എത്തുമെന്ന് ഉറപ്പായി. ഫ്രീ ട്രാൻസ്ഫറിലാണ് താരം യുവന്റസിൽ എത്തുന്നത്. പി.എസ്.ജിയിൽ ജൂൺ 30ന് കരാർ കാലാവധി അവസാനിക്കുന്നതോടെ താരത്തിന്റെ യുവന്റസിലേക്കുള്ള വരവ് ഔദ്യോകികമാവുമെന്നാണ് കരുതപ്പെടുന്നത്.
24കാരനായ റാബിയോ നാല് വർഷത്തെ കരാറിലാവും യുവന്റസിൽ എത്തുക. ഈ സീസണിൽ യുവന്റസ് ഫ്രീ ട്രാൻസ്ഫറിൽ സ്വന്തമാക്കുന്ന രണ്ടാമത്തെ താരമാണ് റാബിയോ. നേരത്തെ ആഴ്സണൽ താരം ആരോൺ റാംസിയെയും ഫ്രീ ട്രാൻസ്ഫറിൽ യുവന്റസ് സ്വന്തമാക്കിയിരുന്നു. കഴിഞ്ഞ ഡിസംബർ മുതൽ റാബിയോക്ക് പി.എസ്.ജി ടീമിൽ അവസരം ലഭിച്ചിരുന്നില്ല. താരം കരാർ പുതുക്കാൻ വിസമ്മതിച്ചതിനെ തുടർന്നാണ് ടീമിൽ അവസരം ലഭിക്കാതിരുന്നത്.
ഈ സീസണിന്റെ അവസാനത്തോടെ പരിശീലകനായിരുന്ന അല്ലെഗ്രി ടീം വിട്ടിരുന്നു. തുടർന്ന് ചെൽസിയുടെ പരിശീലകനായിരുന്ന മൗറിസിയോ സരി യുവന്റസിൽ എത്തിയിരുന്നു.