സൗദി അറേബ്യയിൽ നിന്ന് ഒരു ഫുട്ബോൾ താരത്തിനു മുന്നിൽ കൂടി വലിയ ഓഫർ വന്നിരിക്കുകയാണ്. ഗലറ്റസറെക്കായി കളിക്കുന്ന അർജന്റീന താരം ഇക്കാർഡിക്ക് മുന്നിൽ ആണ് വലിയ ഓഫർ എത്തിയിരിക്കുന്നത്. അൽ തൗവൂൻ എഫ് സിയാണ് ഇക്കാർഡിയെ സമീപിച്ചിരിക്കുന്നത്. ഇക്കാർഡി ഇപ്പോൾ സൗദിയിൽ നിന്ന് ഉള്ള ഓഫർ സ്വീകരിക്കുന്ന ആലോചനയിലാണ്.
ഗലറ്റസറെയിൽ പി എസ് ജിയിൽ നിന്ന് ലോണിൽ ആയിരിന്നു താരം കളിച്ചു കൊണ്ടിരുന്നത്. അതുകൊണ്ട് തന്നെ പി എസ് ജിയാകും അന്തിമമായി തീരുമാനം എടുക്കുന്നത്. ഇക്കാർഡിയെ വിൽക്കാൻ കഴിഞ്ഞ സീസൺ മുതൽ പി എസ് ജി ശ്രമിക്കുന്നുണ്ട്. എന്നാൽ താരത്തിന്റെ ഉയർന്ന വേതനം കാരണം ആരും താരത്തെ വാങ്ങാൻ തയ്യാറായിരുന്നില്ല.
ഇന്റർ വിട്ട് മൂന്ന് സീസൺ മുമ്പ് പാരീസിൽ എത്തിയപ്പോൾ തുടക്കത്തിൽ ഇക്കാർഡി തിളങ്ങിയിരുന്നു എങ്കിലും സൂപ്പർ താരങ്ങളുടെ നീണ്ട നിര ഉള്ളത് കൊണ്ട് ഇക്കാർഡിക്ക് അധികം അവസരങ്ങൾ പി എസ് ജിയിൽ പിന്നെ ലഭിച്ചിരുന്നില്ല.