ഇബ്രാഹിമോവിച് ഇറ്റലിയിലേക്ക് മടങ്ങും എന്ന് ഉറപ്പായി. ഇബ്രാഹിമോവിചും എ സി മിലാനുമായി കരാറിൽ എത്തിയതായി ഇറ്റാലിയൻ മാധ്യമമായ സ്കൈ സ്പോർട്സ് റിപ്പോർട്ട് ചെയ്തു. കരാറിൽ താരം ജനുവരി ആദ്യത്തിൽ ഒപ്പിവെക്കും. ഒരു വർഷത്തെ കരാറിലാകും ഇബ്ര എ സി മിലാനിൽ തിരികെയെത്തുക. 38കാരനായ ഇബ്രാഹിമോവിച് നേരത്തെ തന്നെ ഇറ്റലിയിലേക്ക് താൻ മടങ്ങും എന്ന് പറഞ്ഞിരുന്നു.
അമേരിക്കൻ ക്ലബായ എൽ എ ഗാലക്സിയുമായുള്ള കരാർ അവസാനിച്ചതോടെ അമേരിക്ക വിടാൻ ഇബ്ര തീരുമാനിച്ചിരുന്നു. 18 മാസത്തോളം അമേരിക്കയിൽ കളിച്ച ഇബ്ര അവിടെ ഗോളുകൾ അടിച്ചു കൂട്ടിയിരുന്നു. നേരത്തെ എ സി മിലാനു വേണ്ടി കളിച്ചിട്ടുള്ള ഇബ്ര അവർക്ക് ഒപ്പം ലീഗ് കിരീടവും നേടിയിട്ടുണ്ട്. മിലാനു വേണ്ടി 85 മത്സരങ്ങളിൽ നിന്ന് 56 ഗോളുകളും മുമ്പ് ഇബ്ര നേടിയിട്ടുണ്ട്. ഇബ്രയുടെ വരവ് തങ്ങളെ പ്രതാപ കാലത്തേക്ക് തിരികെ കൊണ്ടു പോകുമെന്ന പ്രതീക്ഷയിലാണ് മിലാൻ ആരാധകർ.