സ്പർസിന്റെ ഒന്നാം ഗോൾ കീപ്പർ ആയ ഹ്യൂഗോ ലോരിസ് ക്ലബ് വിടുമെന്ന് ഉറപ്പായി. ലോരിസിന് ക്ലബ് വിടാം എന്നും പരിശീലനത്തിന് ടീമിനൊപ്പം എത്തേണ്ടതില്ല എന്ന ഇളവും ക്ലബ് കൊടുത്തു. താരം ഉടൻ തന്നെ പുതിയ ക്ലബ് കണ്ടെത്തും. പല ക്ലബുകളുമായും ഇപ്പോൾ ലോരിസ് ചർച്ചകൾ നടത്തുന്നുണ്ട്.
അവസാന 11 വർഷമായി സ്പർസിനൊപ്പം ഉള്ള താരമാണ് ലോരിസ്. സ്പർസിനായി ഏറ്റവും കൂടുതൽ മത്സരം കളിച്ച താരവുമാണ് ലോരിസ്. സൗദി അറേബ്യൻ ക്ലബായ അൽ ഹിലാൽ ആകും ലോരിസിന്റെ അടുത്ത ക്ലബ് എന്ന് സൂചനകൾ ഉണ്ട്. താരവും അൽ ഹിലാലും തമ്മിലുള്ള ചർച്ചകൾ തുടരുന്നുണ്ട്.
കഴിഞ്ഞ ജനുവരിയിൽ ഫ്രാൻസ് ദേശീയ ടീമിൽ നിന്നും ലോരിസ് വിരമിച്ചിരുന്നു. ലോറിസ് നാല് ലോകകപ്പുകളിലും മൂന്ന് യൂറോകളിലും ഫ്രാൻസിനെ പ്രതിനിധീകരിച്ചിട്ടുണ്ട്. 2018-ൽ ലോകകപ്പ് കിരീടത്തിൽ അദ്ദേഹം വലിയ പങ്കുവഹിച്ചിരുന്നു. ടോട്ടനത്തിന് ഒപ്പം ഇത്ര നീണ്ടകാലം കളിച്ചു എങ്കിലും ഒരു കിരീടം നേടാൻ ആകാതെയാണ് ലോരിസ് ക്ലബ് വിടുന്നത്.