ഇംഗ്ലീഷ് ക്യാപ്റ്റൻ ഹാരി കെയിന് ആയുള്ള ശ്രമങ്ങൾ തുടർന്ന് ബയേൺ മ്യൂണിക്. നിലവിൽ രണ്ടു തവണയാണ് താരത്തിന് ആയി ബയേണിന്റെ ഓഫറുകൾ ടോട്ടനം തള്ളിയത്. അവസാനം 80 മില്യൺ യൂറോയുടെ ഓഫർ ആണ് 29 കാരനായ ഇംഗ്ലീഷ് ക്യാപ്റ്റനു ആയി ജർമ്മൻ ചാമ്പ്യന്മാർ മുന്നോട്ട് വച്ചത്. ഒരു വർഷത്തെ കരാർ ടോട്ടനത്തിൽ അവശേഷിക്കുന്ന താരത്തിനെ സ്വന്തമാക്കാൻ ആയി ബയേണിന്റെ പുതിയ സി.ഇ.ഒ യാൻ ക്രിസ്റ്റിയൻ-ഡ്രീസൻ ടോട്ടനം ചെയർമാൻ ഡാനിയേൽ ലെവിയും ആയി കൂടിക്കാഴ്ച നടത്തി.
നിലവിൽ താരത്തിന് ആയി പുതിയ ഓഫർ മുന്നോട്ട് വച്ചില്ലെങ്കിലും തങ്ങളുടെ താരത്തിന് ആയുള്ള താൽപ്പര്യം ജർമ്മൻ അധികൃതർ വ്യക്തമാക്കി എന്നാണ് സൂചന. ഈ കൂടിക്കാഴ്ചയെ കുറിച്ച് ഹാരി കെയിനെയും ക്ലബ് അറിയിച്ചിട്ടുണ്ട്. നിലവിൽ കെയിൻ നാളെ ടോട്ടനത്തിനു ഒപ്പം പ്രീ സീസണിനു ആയി യാത്ര തിരിക്കും. നേരത്തെ ടോട്ടനം കെയിനു മുമ്പ് വമ്പൻ കരാർ മുന്നോട്ട് വച്ചത് ആയി റിപ്പോർട്ട് ഉണ്ടായിരുന്നു. കെയിന് ആയി പരമാവധി ശ്രമിക്കാൻ ആണ് ബയേൺ പരിശീലകൻ തോമസ് ടൂഹൽ ക്ലബിന് കൊടുത്ത നിർദ്ദേശം എന്നാണ് റിപ്പോർട്ട്.