എവർട്ടൺ താരം ആന്റണി ഗോർഡന് വേണ്ടിയുള്ള നീക്കങ്ങൾ ന്യൂകാസിൽ ശക്തമാക്കുന്നു. താരത്തിന് വേണ്ടിയുള്ള ആദ്യ ഓഫർ ന്യൂകാസിൽ സമർപ്പിച്ചതായി ടെലിഗ്രാഫ് റിപ്പോർട്ട് ചെയ്യുന്നു. എന്നാൽ എവർടൻ ആവശ്യപ്പെടുന്ന അറുപത് മില്യൺ പൗണ്ട് എന്ന തുകയിലേക്ക് ന്യൂകാസിലിന്റെ ഓഫർ എത്തില്ല എന്നാണ് സൂചന. എങ്കിലും ഇരു ടീമുകളും തമ്മിലുള്ള ചർച്ചകൾ അവസാന വാരം മുതൽ നടന്ന് കൊണ്ടിരിക്കുകയാണ്. ചെൽസിയും ഗോർഡനെ ലക്ഷ്യമിട്ടിരുന്നു.
ക്രിസ് വുഡ് നോട്ടിങ്ഹാമിലേക്ക് ചേക്കേറിയതോടെയാണ് മറ്റൊരു മുന്നേറ്റ താരത്തെ എത്തിക്കാനുള്ള നീക്കങ്ങൾക്ക് ന്യൂകാസിൽ ആക്കം കൂട്ടിയത്. ഗോർഡന് വേണ്ടി സീസണിന്റെ തുടക്കത്തിലും മാഗ്പീസ് ശ്രമിച്ചിരുന്നു. എന്നാൽ അന്ന് അവരുടെ ഓഫർ എവർടൻ തള്ളി. അതേ സമയം അറുപത് മില്യൺ പൗണ്ട് എന്ന തുകയിൽ വിട്ടു വീഴ്ച്ച ഉണ്ടായില്ലെങ്കിൽ പകരം ചെൽസി താരം ഹക്കീം സിയാച്ചിനെ എത്തിക്കാനും ന്യൂകാസിൽ ശ്രമിച്ചേക്കും എന്നു ടെലിഗ്രാഫ് സൂചിപ്പിച്ചു.
