മാഞ്ചസ്റ്റർ യുണൈറ്റഡ് വിടണമെന്ന് പറഞ്ഞ പോൾ പോഗ്ബയെ വിൽക്കാൻ പരിശീലകൻ ഒലെ ഗണ്ണാർ സോൾഷ്യാർ സമ്മതം മൂളിയതായി ഇംഗ്ലീഷ് മാധ്യമങ്ങൾ റിപ്പോർട്ട് ചെയ്യുന്നു. പോഗ്ബ ആണ് ടീമിന്റെ ഏറ്റവും പ്രധാനപ്പെട്ട താരം എന്നായിരുന്നു ഇതുവരെ സോൾഷ്യാർ പറഞ്ഞിരുന്നത്. ആര് കൂടുതൽ കാശ് നൽകുന്നോ അവർക്ക് പോഗ്ബയെ വിൽക്കാൻ ആണ് പരിശീലകന്റെ നിർദേശം. പോഗ്ബയെ വിറ്റു കിട്ടുന്ന കാശ് പുതിയ താരങ്ങളെ എത്തിക്കാൻ ഉപയോഗിക്കാമെന്ന് സോൾഷ്യാർ കരുതുന്നു.
പോൾ പോഗ്ബയ്ക്കായി മുൻ ക്ലബായ യുവന്റസും റയൽ മാഡ്രിഡുമാണ് പ്രധാനമായി രംഗത്ത് ഉള്ളത്. പോൾ പോഗ്ബ മാഞ്ചസ്റ്റർ ക്ലബ് വിടാനുള്ള തന്റെ ആഗ്രഹം വ്യക്തമാക്കിയത് മുതൽ ഇരു ക്ലബുകളും താരത്തിനു പിന്നാലെ ഉണ്ട്. മൂന്ന് വർഷം മുമ്പ് റെക്കോർഡ് തുകയ്ക്കാണ് പോഗ്ബ യുണൈറ്റഡ് എത്തിയത്. അന്ന് യുവന്റസിൽ നിന്ന് 90 മില്യൺ തുകയ്ക്കായിരുന്നു യുണൈറ്റഡ് പോഗ്ബയെ സ്വന്തമാക്കിയത്. ഇപ്പോൾ യുണൈറ്റഡ് ആവശ്യപ്പെടുന്നത് 150മില്യണോളമാണ്.
