കണ്ണൂര്: 29 വയസ്സുകാരന് സെനഗല് സ്ട്രൈക്കര് അബ്ദു കരിം സാംബ് കണ്ണൂര് വാരിയേഴ്സ് ഫുട്ബോള് ക്ലബില്. കഴിഞ്ഞ സീസണില് ഐ ലീഗില് റിയല് കാശ്മീര് എഫ്സിക്ക് വേണ്ടി ബൂട്ടുകെട്ടിയ താരമാണ് അബ്ദു കരിം സാംബ്. ഐ ലീഗില് റിയല് കാശ്മിരിന് വേണ്ടി 22 മത്സരങ്ങള് കളിച്ച താരം അഞ്ച് ഗോളും രണ്ട് അസിസ്റ്റും നേടി. ആറ് അടി ഉയരമുള്ള താരം സെറ്റ്പീസുകളില് ഗോള് നേടാന് മിടുക്കനാണ്.
ഇന്ത്യയില് റിയല് കാശ്മീരിന് പുറമെ ഷിലോങ് ലജോങ്, ചര്ച്ചില് ബ്രദേഴ്സ് എന്നീ മുന്നിര ക്ലബുകള്ക്കുവേണ്ടിയും താരം കളിച്ചിട്ടുണ്ട്. ഇരുടീമുകള്ക്കുമായി എട്ട് ഗോളും മൂന്ന് അസിസ്റ്റും നേടിയിട്ടുണ്ട്. തുര്ക്കി, ബെറൂത്ത്, മൊറോക്കോ, ലെബനന്, ലിബിയ എന്നീ രാജ്യങ്ങളിലെ ലീഗുകളില് കഴിവ് തെളിഞ്ഞിച്ച താരമാണ്. 2016-ല് സെനഗല് ഒന്നാം ഡിവിഷന് ക്ലബ് എ.എസ്.സി. ജറാഫിറിലൂടെയാണ് കരിയറിന്റെ തുടക്കം. 2016 ല് ടീമിനെ കിരീടത്തിലേക്ക് നയിക്കുന്നതില് നിര്ണായക പങ്കുവഹിച്ചു. ആ സീസണില് ലീഗിലെ മികച്ച കളിക്കാരനുമായി. 2017-ലും ജറാഫ് എഫ്.സി. കിരീടം നേടിയെങ്കിലും ഏറ്റവും അധികം ഗോള് നേടിയവരുടെ പട്ടികയില് രണ്ടാമതായി. ഈ സീസണിലെ കണ്ണൂര് വാരിയേഴ്സിന്റെ അഞ്ചാം വിദേശ സൈനിങാണ്.