ഗ്രൂപ്പ് സിയിൽ മൂന്നാം പരാജയവുമായി ഗോകുലം സൂപ്പർ കപ്പ് യാത്ര അവസാനിപ്പിച്ചു. ഇന്ന് ജംഷദ്പൂർ എഫ് സി രണ്ടിനെതിരെ മൂന്ന് ഗോളുകൾക്കാണ് വിജയിച്ചത്. മൂന്നിൽ മൂന്നും വിജയിച്ച് ജംഷദ്പൂർ സെമിയിലേക്ക് മുന്നേറി.
ഹോം ഗ്രൗണ്ടായ കാലിക്കറ്റ് കോർപ്പറേഷൻ സ്റ്റേഡിയത്തിൽ ഹീറോ സൂപ്പർ കപ്പിലെ ആശ്വാസ ജയം തേടിയിറങ്ങിയ ഗോകുലം കേരളക്ക് വേണ്ടി സാമൂവൽ 36 ആം മിനുട്ടിൽ ആദ്യ ഗോൾ നേടി. മൂന്ന് താരങ്ങളെ മറി കടന്ന് മലയാളി താരം സൗരവ് നൽകിയ പാസ്സിലായിരുന്നു ഗോൾ.
40 ആം മിനുട്ടിൽ ജംഷഡ്പൂർ സമനില ഗോൾ നേടി. ജംഷഡ്പൂരിന് വേണ്ടി ഹാരിസൺ സ്വയർ ആണ് ഗോൾ നേടിയത്.
രണ്ടാം പകുതിയിൽ ഫറൂഖ് ചൗധരി 59ആം മിനുട്ടിലും ഇഷാൻ പണ്ഡിറ്റ 69ആം മിനുട്ടിലും ജംഷഡ്പൂരിനു വേണ്ടി ഗോൾ നേടി. അവർ 3-1ന് മുന്നിൽ എത്തി. ആദ്യ പകുതിയിൽ ഗോകുലത്തിന് വേണ്ടി ഗോൾ നേടിയ സാമൂവൽ 62ആം മിനുട്ടിൽ ഗോകുലത്തിന് വേണ്ടി രണ്ടാം ഗോൾ നേടി എങ്കിലും പരാജയം ഒഴിവായില്ല.
