സെവൻസിലെ എൽ ക്ലാസികോ എന്ന് അറിയപ്പെടുന്ന പോരാട്ടമായ അൽ മദീന ചെർപ്പുളശ്ശേരിയും ഫിഫ മഞ്ചേരിയും തമ്മിലുള്ള പോരാട്ടമാണ് ഇന്നലെ നിലമ്പൂർ അഖിലേന്ത്യാ സെവൻസിൽ കണ്ടത്. അവിടെ നടന്ന കിരീട പോരാട്ടത്തിൽ ഫിഫാ മഞ്ചേരിയെ പരാജയപ്പെടുത്തി കിരീടം ഉയർത്താൻ അൽ മദീനക്ക് ആയി. മറുപടിയില്ലാത്ത ഏക ഗോളിനായിരുന്നു അൽ മദീനയുടെ വിജയം. അൽ മദീനയുടെ ഈ സീസണിലെ ആദ്യ കിരീടം ആണിത്.
നാസർ ആണ് അൽ മദീനയുടെ വിജയ ഗോൾ നേടിയത്. 20 വാര അകലെ നിന്ന് നാസർ തൊടുത്ത ഇടം കാലൻ ഷോട്ട് തടയാൻ ആർക്കും ആയില്ല. ഈ ഗോളിന് മറുപടി പറയാൻ ഫിഫാ മഞ്ചേരിക്ക് കഴിഞ്ഞില്ല. കളിയിലെ താരമായി നാസറിനെ തിരഞ്ഞെടുത്തു. അൽ മദീനയുടെ ജിൻഷാദ് ആണ് നിലമ്പൂർ ടൂർണമെന്റിലെ മികച്ച താരമായി മാറിയത്. മദീനയുടെ റാഷിദ് ടൂർണമെന്റിലെ എമേർജിങ് പ്ലയർ ആയും ഫിഫയുടെ സലാം ടൂർണമെന്റിലെ മികച്ച ഗോൾ കീപ്പർ ആയും തിരഞ്ഞെടുക്കപ്പെട്ടു.