സീരി എയിൽ വീണ്ടും യുവന്റസിന് നിരാശ. തുടർച്ചയായ മൂന്നാം മത്സരത്തിലും അവർക്ക് ജയിക്കാൻ ആയില്ല. ഇന്നലെ നടന്ന മത്സരത്തിൽ സസുവോള ആണ് യുവന്റസിനെ സമനിലയിൽ പിടിച്ചത്. തുടക്കത്തിൽ രണ്ട് ഗോളിന് മുന്നിട്ട് നിന്നിരുന്ന യുവന്റസ് അവസാനം 3-3ന്റെ സമനിലയുമായി രക്ഷപ്പെടുകയായിരുന്നു. മത്സരത്തിന്റെ ആദ്യ 12 മിനുട്ടുകളിൽ തന്നെ യുവന്റസ് രണ്ട് ഗോളിന് മുന്നിൽ എത്തിയിരുന്നു.
ഡനിലോയും ഹിഗ്വയിനും ആയിരുന്നു ഗോളുകൾ നേടിയത്. രണ്ട് ഗോളുകളും ഒരുക്കിയത് പ്യാനിച് ആയിരുന്നു. ഈ ഗോളുകൾക്ക് ശേഷം ഉണർന്ന സസുവോളോ യുവന്റസിനെ ഞെട്ടിച്ചു എന്ന് തന്നെ പറയാം. 29ആം മിനുട്ടിൽ ജുറിസിചിലൂടെ അവരുടെ ആദ്യ ഗോൾ വന്നു. 51ആം മിനുട്ടിൽ ബെറാഡി സസുവോളയ്ക്ക് സമനിലയും നേടിക്കൊടുത്തു. 54ആം മിനുട്ടിൽ കപുറ്റോയിലൂടെ മൂന്നാം ഗോളും അടിച്ച് സസുവോളോ 3-2ന് മുന്നിക് എത്തി.
64ആം മിനുട്ടിൽ അലക്സ് സാൻഡ്രീയുടെ ഗോളാണ് യുവന്റസിന് സമനില നേടിക്കൊടുത്തത്. ഇന്നലെ ലാസിയോയും പോയന്റ് നഷ്ടപ്പെടുത്തിയത് യുവന്റസിന് ആശ്വാസം നൽകും. യുവന്റസിന് ഇപ്പോൾ 33 മത്സരങ്ങളിൽ നിന്ന് 77 പോയന്റാണ് ഉള്ളത്. ഇപ്പോഴും 7 പോയന്റിന്റെ ലീഡ് യുവന്റസിന് ഉണ്ട്.