സന്തോഷ് ട്രോഫി ഫൈനൽ റൗണ്ടിൽ കേരളം വിജഴവഴിയിൽ തിരികെയെത്തി. വിജയം ഇല്ലാത്ത രണ്ടു മത്സരങ്ങൾക്ക് ശേഷം ഇന്ന് ഒഡീഷയെ ആണ് കേരളം പരാജയപ്പെടുത്തിയത്. മറുപടിയില്ലാത്ത ഒരു ഗോളിനായിരുന്നു കേരളത്തിന്റെ വിജയം. ഇന്ന് ആദ്യ പകുതിയിൽ ഒരു പെനാൾട്ടിയിലൂടെയാണ് കേരളം ലീഡ് എടുത്തത്. 16ആം മിനുട്ടിൽ ഒരോ കോർണറിൽ നിന്ന് സംഭവിച്ച ഹാൻഡ് ബോൾ റഫറി പെനാൾട്ടി വിളിക്കുകയായിരുന്നു.
പെനാൾട്ടി എടുത്ത നിജോ ഗിൽബേർട്ട് സമ്മർദ്ദങ്ങൾ മറികടന്ന് പന്ത് വലയിൽ എത്തിച്ചു. കേരള ഫുട്ബോൾ പ്രേമികൾ ആഗ്രഹിക്കുന്ന ആധിപത്യം കേരളത്തിൽ നിന്ന് ഉണ്ടായില്ല എങ്കിലും വിജയം ഉറപ്പിക്കാൻ നിലവിലെ ചാമ്പ്യന്മാർക്ക് ആയി. ഈ വിജയം കേരളത്തെ നാലു മത്സരളിൽ നിന്ന് 7 പോയിന്റിൽ എത്തിച്ചു. കേരളം ഇപ്പോൾ മൂന്നാം സ്ഥാനത്താണ്. 8 പോയിന്റ് ഉള്ള കർണാടക ഒന്നാം സ്ഥാനത്തും ഏഴ് പോയിന്റ് ഉള്ള പഞ്ചാബ് രണ്ടാം സ്ഥാനത്തും ആണ്. ഇനി അവസാന മത്സരത്തിൽ പഞ്ചാബിനെ തോൽപ്പിച്ചാൽ കേരളത്തിന് സെമി ഫൈനൽ ഉറപ്പിക്കാം. ഗ്രൂപ്പിലെ ആദ്യ രണ്ടു സ്ഥാനക്കാരാണ് സെമി ഫൈനലിൽ എത്തുക.