സന്തോഷ് ട്രോഫി കിരീടം ഒരിടവേളയ്ക്ക് ശേഷം വീണ്ടും സർവീസസിന് സ്വന്തം. ഇന്ന് വൈകിട്ട് നടന്ന ഫൈനലിൽ ആതിഥേയർ കൂടിയായ പഞ്ചാബിനെ മുട്ടുകുത്തിച്ചാണ് സർവീസസ് കിരീടം ഉറപ്പിച്ചത്. ആവേശകരമായ മത്സരത്തിൽ എതിരില്ലാത്ത ഏക ഗോളിനായിരുന്നു സർവീസസ് ജയിച്ചത്. കളിയുടെ 61ആം മിനുട്ടിൽ ബികാഷ് താപയാണ് സർവീസസിനായി വിജയഗോൾ നേടിയത്. ലാലാകിമ കൊടുത്ത പാസിൽ നിന്നായിരുന്നു ബികാഷിന്റെ ഗോൾ.
സെമിയിൽ കർണാടകയെ മറികടന്നായിരുന്നു സർവീസസ് ഫൈനലിൽ എത്തിയത്. ഗ്രൂപ്പ് എ ചാമ്പ്യന്മാർ കൂടി ആയിരുന്ന സർവീസസ് ഫൈനൽ റൗണ്ടിൽ ഒരു മത്സരം പോലും പരാജയപ്പെട്ടില്ല. ഈ കിരീടം സർവീസസിന്റെ അഞ്ചാം സന്തോഷ് ട്രോഫിയാണ്. കഴിഞ്ഞ വർഷം കേരളം ആയിരുന്നു സന്തോഷ് ട്രോഫി ചാമ്പ്യൻസ്. ഈ വർഷം സർവീസസ് ടീമിലും നിരവധി മലയാളി സാന്നിദ്ധ്യമുണ്ട്.