ഗോവയ്ക്ക് വീണ്ടും ജയം, എങ്കിലും ഗ്രൂപ്പിൽ രണ്ടാം സ്ഥാനം

സന്തോഷ് ട്രോഫി ഫൈനൽ റൗണ്ടിൽ തങ്ങളുടെ അവസാന മത്സരത്തിലും ഗോവയ്ക്ക് വിജയം. നേരത്തെ തന്നെ സെമി ഉറപ്പിച്ച ഗോവ ഇന്ന് ജയിച്ചെങ്കിലും ഗ്രൂപ്പ് ചാമ്പ്യന്മാരായില്ല. ഇന്ന് വൈകിട്ട് നടന്ന ഗ്രൂപ്പ് എ പോരാട്ടത്തിൽ മേഘാലയയെ ആണ് ഗോവ പരാജയപ്പെടുത്തിയത്. ഒന്നിനെതിരെ രണ്ടു ഗോളുകൾക്കായിരുന്നു ഗോവയുടെ വിജയം. ഗോവയ്ക്ക് വേണ്ടി വിക്ടോറീനോയും ചൈതാനുമാണ് ഗോൾ സ്കോർ ചെയ്തത്.

ഈ വിജയത്തോടെ നാലു മത്സരങ്ങളിൽ നിന്ന് പത്ത് പോയന്റുമായി ഗോവ ഗ്രൂപ്പിൽ രണ്ടാം സ്ഥാനത്ത് ഫിനിഷ് ചെയ്തു. 10 പോയന്റ് തന്നെയുള്ള സർവീസസ് മെച്ചപ്പെട്ട ഗോൾ ശരാശരിയിൽ ആദ്യ സ്ഥാനം ഉറപ്പാക്കി.