വീണ്ടും മലയാളി കരുത്തിൽ വിശ്വാസം അർപ്പിച്ച് കർണാടക സന്തോഷ് ട്രോഫിക്ക് ഇറങ്ങുന്നു

- Advertisement -

ഇത്തവണയും കർണാടക തങ്ങളുടെ സന്തോഷ് ട്രോഫി ടീം പ്രഖ്യാപിച്ചപ്പോൾ മലയാളികളുടെ സാന്നിദ്ധ്യം. കഴിഞ്ഞ തവണ കർണാടകയുടെ സെമി ഫൈനൽ വരെയുള്ള അത്ഭുത തേരോട്ടത്തിന് പ്രധാന കാരണം മലയാളികൾ ആയിരുന്നു. അതുകൊണ്ട് ഇത്തവണ വീണ്ടും മലയാളികളിൽ തന്നെ വിശ്വാസം അർപ്പിച്ചിരിക്കുകയാണ് കർണാടക.

മൂന്ന് മലയാളികളാണ് ഇത്തവണ കർണാടക സന്തോഷ് ട്രോഫി ടീമിൽ ഉള്ളത്. അറ്റാക്കിംഗ് മിഡ്ഫീൽഡറായ ലിയോൺ അഗസ്റ്റിൻ, ഗോൾ കീപ്പറായ മുഹമ്മദ് ഷമ്നാസ് എന്ന ഷാനു, ഡിഫൻഡറായ ആഷിഖ് എന്നിവരാണ് കർണാടകയുടെ അന്തിമ ടീമിൽ ഇടംപിടിച്ചത്.


ബെംഗളൂരു എഫ് സിയുടെ താരമായ ലിയോൺ അഗസ്റ്റിൻ കഴിഞ്ഞ വർഷവും കർണാടക സന്തോഷ് ട്രോഫി ടീമിൽ ഉണ്ടായിരുന്നു. കോഴിക്കോട് സ്വദേശിയാണ് ലിയോൺ. എഫ് സി തൃശ്ശൂരിനായി അവസാന രണ്ടു സീസണുകളിൽ വല കാത്ത താരമാണ് ഷാനു. ചങ്ങരംകുളം സ്വദേശിയാണ് ഷാനു. എം ഡി കോളേജിന്റെയും താരമായിരുന്നു. ഇപ്പോൾ ബെംഗളൂരു യുണൈറ്റഡിനായി കളിക്കുകയാണ്.

ഡിഫൻഡറായ ആഷികും ഇപ്പോൾ ബെംഗളൂരു യുണൈറ്റഡിനായി കളിക്കുകയാണ്. മുമ്പ് എഫ് സി കേരളയ്ക്കായും എഫ് സി തൃശ്ശൂരിനായും കളിച്ചിട്ടുണ്ട് തൃശ്ശൂർ സ്വദേശിയാണ്.

കഴിഞ്ഞ സീസണിൽ നാലു മലയാളികളുടെ മികവിലാണ് കർണാടക സെമിവരെ എത്തിയത് .ഗോൾകീപ്പർ ഷൈൻ ഖാൻ, ലിയോൺ അഗസ്റ്റിൻ, രാജേഷ്, ഷഫീൽ എന്നിവരായിരുന്നു അന്നത്തെ കർണാടക സ്ക്വാഡിലെ മലയാളികൾ. ഇപ്പോഴത്തെ ഗോകുലം കേരള എഫ് സി താരം രാജേഷ് കഴിഞ്ഞ തവണ കർണാടകയുടെ ടോപ്പ് സ്കോറർ ആയിരുന്നു.

Advertisement