ഇസ്താംബുൾ, 2025 ജൂൺ 11: ജർമ്മൻ ദേശീയ ടീം താരം ലെറോയ് സാനെ ബയേൺ മ്യൂണിക്ക് വിട്ട് തുർക്കിയിലെ അതികായന്മാരായ ഗലാറ്റസറേയിലേക്ക് ചേക്കേറാൻ ഒരുങ്ങുന്നു. മൂന്ന് വർഷത്തെ കരാറിലാണ് സാനെ ഗലാറ്റസറേയിൽ എത്തുന്നത്. പ്രതിവർഷം 15 ദശലക്ഷം യൂറോ വരെ പ്രതിഫലം ലഭിക്കുന്ന കരാറാണിതെന്നാണ് റിപ്പോർട്ടുകൾ.
ബയേൺ മ്യൂണിക്കുമായി 2025 ജൂൺ അവസാനത്തോടെ കരാർ അവസാനിക്കാനിരിക്കെ, 29 വയസ്സുകാരനായ സാനെയ്ക്കായി ആഴ്സണൽ, അൽ ഹിലാൽ, ഫെനർബാഷെ തുടങ്ങിയ നിരവധി പ്രമുഖ ക്ലബ്ബുകൾ രംഗത്തുണ്ടായിരുന്നു. ആഴ്സണൽ സാനെയുമായി ചർച്ചകൾ നടത്തിയിരുന്നെങ്കിലും, താരത്തിന് വേഗത്തിൽ ഒരു തീരുമാനത്തിലെത്താനായിരുന്നു താല്പര്യം.
ഗലാറ്റസറേയുടെ ഓഫർ കൂടുതൽ ആകർഷകമായതോടെയാണ് സാനെ തുർക്കിയിലേക്ക് പോകാൻ തീരുമാനിച്ചത്. 2020-ൽ മാഞ്ചസ്റ്റർ സിറ്റിയിൽ നിന്ന് 49 ദശലക്ഷം യൂറോയും മറ്റ് ആഡ്-ഓണുകളും നൽകി ബയേണിലെത്തിയ സാനെയുടെ അഞ്ച് വർഷത്തെ ബയേൺ കരിയറിനാണ് ഇതോടെ തിരശ്ശീല വീഴുന്നത്.
മ്യൂണിക്കിലെ തന്റെ കരിയറിൽ സാനെ മൂന്ന് ബുണ്ടസ്ലിഗ കിരീടങ്ങൾ നേടി. 220 മത്സരങ്ങളിൽ നിന്ന് 61 ഗോളുകളും 55 അസിസ്റ്റുകളും അദ്ദേഹം സ്വന്തമാക്കിയിട്ടുണ്ട്.