സൗദി പ്രോ ലീഗിൽ അൽ നസറിന് വിജയം നൽകി ക്രിസ്റ്റ്യാനോ റൊണാൾഡോ. ഇന്ന് ദമാകിനെ നേരിട്ട അൽ നസർ ഒന്നിനെതിരെ രണ്ടു ഗോളുകൾക്ക് ആണ് വിജയിച്ചത്. തുടക്കത്തിൽ ഒരു ഗോളിന് പിറകിൽ നിന്ന ശേഷമായിരുന്നു അൽ നസറിന്റെ തിരിച്ചുവരവ്. മത്സരം 1-1ൽ നിൽക്കെ റൊണാൾഡോയുടെ ഒരു ഫ്രീകിക്ക് ഗോളാണ് വിജയ ഗോളായി മാറിയത്.
മത്സരത്തിൽ ആദ്യ പകുതിയുടെ അവസാനത്തിൽ എങ്കുദു ആണ് ദമാകിന് ലീഡ് നൽകിയത്. രണ്ടാം പകുതിയുടെ തുടക്കത്തിൽ ടലിസ്കയുടെ ഗോളിലൂടെ അൽ നസർ സമനില പിടിച്ചു. ഇതു കഴിഞ്ഞ് 57ആം മിനുട്ടിൽ ആയിരുന്നു റൊണാൾഡോയുടെ ഫ്രീകിക്ക് ഗോൾ വന്നത്. 2023ലെ റൊണാൾഡോയുടെ 41ആം ഗോളായിരുന്നു ഇത്. ഇതോടെ അൽ നസർ വിജയം ഉറപ്പിച്ചു.
ഈ ജയം അൽ നസറിനെ ലീഗിൽ മൂന്നാം സ്ഥാനത്ത് നിർത്തുന്നു. അവർക്ക് 10 മത്സരങ്ങളിൽ നിന്ന് 22 പോയിന്റാണ് ഉള്ളത്. 26 പോയിന്റുള്ള അൽ ഹിലാൽ ആണ് ഒന്നാമത് ഉള്ളത്.