ഇഞ്ചുറി ടൈം ഗോളിൽ വോൾവ്സിന് ജയം

ഇംഗ്ലീഷ് പ്രീമിയർ ലീഗിൽ ഇഞ്ചുറി ടൈമിൽ നേടിയ ഗോളിന് വോൾവ്സ് ന്യൂകാസിൽ യുണൈറ്റഡിനെ മറികടന്നു. പത്ത് പേരായി ചുരുങ്ങിയ ന്യൂ കാസിലിനെതിരെ 94 ആം മിനുട്ടിലാണ് ഡോഹർത്തി ഹെഡറിലൂടെ ഗോൾ നേടിയത്. മത്സരം 2-1 നാണ് സാന്റോയുടെ ടീം സ്വന്തമാക്കിയത്.

ഡിയഗോ ഡോട്ടയുടെ ഗോളിൽ വോൾവ്സാണ് മത്സരത്തിൽ ലീഡ് നേടിയത്. പക്ഷെ 23 ആം മിനുട്ടിൽ അയേസോ പെരസ് മാഗ്പീസിനെ ഒപ്പമെത്തിച്ചു. പക്ഷെ 57 ആം മിനുട്ടിൽ യെഡ്‌ലിൻ ചുവപ്പ് കാർഡ് കണ്ട് മടങ്ങിയത് ബെനീറ്റസിന്റെ ടീമിന് വൻ തിരിച്ചടിയായി. ജയത്തോടെ ലീഗിൽ 22 പോയിന്റുമായി വോൾവ്സ് പത്താം സ്ഥാനത്താണ്. 13 പോയിന്റുള്ള ന്യൂകാസിൽ 15 ആം സ്ഥാനത്താണ്.