അവസാനം നിമിഷം വിജയം കൈവിട്ട് വെസ്റ്റ് ഹാം

കളി തീരാൻ മിനിട്ടുകൾ മാത്രം ബാക്കി നിൽക്കെ വഴങ്ങിയ ഗോളിൽ വെസ്റ്റ് ഹാം ലെസ്റ്ററിനോട് സമനില വഴങ്ങി. ലെസ്റ്ററിന്റെ മൈതാനത്ത് നടന്ന മത്സരത്തിൽ ഇരു ടീമുകളും ഓരോ ഗോൾ വീതം നേടി. 13 പോയിന്റുള്ള ലെസ്റ്റർ നിലവിൽ 12 ആം സ്ഥാനത്താണ്. 8 പോയിന്റുള്ള വെസ്റ്റ് ഹാം 13 ആം സ്ഥാനത്തും.

ആദ്യ പകുതിയിൽ മത്സരം അര മണിക്കൂർ പിന്നിട്ടപ്പോഴാണ് വെസ്റ്റ് ഹാം ലീഡ് നേടിയത്. ഡിഫൻഡർ ഇസ ഫാബിയൻ ബൽബുവെനയാണ്‌ ഗോൾ നേടിയത്. എന്നാൽ 8 മിനിട്ടുകൾക്ക് ശേഷം ക്യാപ്റ്റൻ മാർക്ക് നോബിൾ ചുവപ്പ് കാർഡ് വഴങ്ങി പുറത്തായത് അവർക്ക് തിരിച്ചടിയായി.

രണ്ടാം പകുതിയിൽ സമനില ഗോളിനായി ലെസ്റ്റർ നിരന്തരം ശ്രമിച്ചതോടെ വെസ്റ്റ് ഹാമിന് തീർത്തും പ്രതിരോധത്തിലേക്ക് വലിയേണ്ടി വന്നു. പക്ഷെ ലെസ്റ്റർ അർഹിച്ച ഗോൾ പിറക്കാൻ 89 ആം മിനുട്ട് വരെ കാത്തിരിക്കേണ്ടി വന്നു. എൻഡിടിയുടെ ഷോട്ട് വെസ്റ്റ് ഹാം താരത്തിന്റെ കാലിൽ തട്ടി ഭാഗ്യത്തിന്റെ അകമ്പടിയോടെ വലയിൽ പതിക്കുകയായിരുന്നു. അവസാന സെക്കന്റുകളിൽ അന്റോണിയോയുടെ ശ്രമം ഗോൾ ആകാതെ പോയത് ഹാമേഴ്സിന് നിർഭാഗ്യമായി.