തുടർച്ചയായി മൂന്നാം മത്സരത്തിലും ഗോൾ കണ്ടെത്തിയ ആന്തണി മാർഷ്യലിന്റെ മികവിൽ മാഞ്ചസ്റ്റർ യുണൈറ്റഡിന് വിജയം. ബേൺലിയെ മാർഷ്യൽ നേടിയ ഏക ഗോളിനാണ് യുണൈറ്റഡ് മറികടന്നത്.
ടർഫ് മൂറിൽ നടന്ന മത്സരത്തിൽ യുണൈറ്റഡിന് ഒരു അവസരവും നൽകാതെയാണ് അതിഥേയരായ ബേൺലി മത്സരം മുന്നോട്ട് കൊണ്ടുപോയത്. ആദ്യ പകുതിയിൽ ഒരു ഷോട്ട് ഓണ് ടാർഗറ്റ് പോലും നൽകാതെ മികച്ച പ്രതിരോധം കാഴ്ചവെച്ച ബേൺലി യുണൈറ്റഡിനെ അക്ഷരാർത്ഥത്തിൽ പിടിച്ചു കെട്ടുകയായിരുന്നു.
രണ്ടാം പകുതിയിൽ ആണ് മത്സരത്തിലെ ഏക ഗോൾ പിറന്നത്. 54ആം മിനിറ്റിൽ ലുകാക്കു നൽകിയ മനോഹരമായ ഒരു പാസ് മാർഷ്യൽ അനായാസം വലയിൽ എത്തിച്ചു. മത്സരത്തിന്റെ അവസാനം യുണൈറ്റഡ് ഗോൾ മുഖത്തെക്ക് ബേൺലി ഇരച്ചു കയറിയെങ്കിലും ഗോൾ വഴങ്ങാതെ പിടിച്ചു നിന്ന് യുണൈറ്റഡ് വിലപ്പെട്ട 3 പോയിന്റുകൾ സ്വന്തമാക്കി.
ഇന്നത്തെ വിജയത്തോടെ യുണൈറ്റഡ് പ്രീമിയർ ലീഗിൽ രണ്ടാം സ്ഥാനം നിലനിർത്തി. ഒരു മത്സരം കുറവ് കളിച്ച സിറ്റിയെക്കാൾ 9 പോയിന്റ് പുറകിലാണ് യുണൈറ്റഡ് ഇപ്പോൾ.
കൂടുതൽ കായിക വാർത്തകൾക്ക് : www.facebook.com/FanportOfficial
