പ്രീമിയർ ലീഗ് ടോപ് ഫോർ പോരാട്ടത്തിൽ നിർണായ വിജയവുമായി ടോട്ടനം. ഇന്ന് ലണ്ടനിൽ വെച്ച് ലൂട്ടൺ ടൗണിനെ നേരിട്ട് സ്പർസ് ഒന്നിനെതിരെ രണ്ടു ഗോളുകൾക്കാണ് വിജയിച്ചത്. കളി അവസാനിക്കാൻ നാലു മിനിറ്റ് മാത്രം ശേഷിക്കെ ഹ്യൂങ് മിൻ സോൺ നേടിയ ഗോളിൽ ആയിരുന്നു ടോട്ടനത്തിന്റെ വിജയം.
ഇന്ന് അത്ര നല്ല രീതിയിലല്ല ടോട്ടനം കളി തുടങ്ങിയത്. മൂന്നാം മിനിറ്റിൽ തന്നെ അവർ പിറകിൽ പോയി. ലുട്ടൻ ടൗണിനായി തഹിത് ചോങാണ് തുടക്കത്തിൽ തന്നെ ഗോൾ നേടിയത്. രണ്ടാം പകുതിയുടെ തുടക്കത്തിൽ 51ആം മിനിറ്റിൽ ഒരു സെൽഫ് ഗോളിലൂടെയാണ് സ്പർസ് കളിയിലേക്ക് തിരിച്ചുവന്നത്. പിന്നീട് വിജയഗോളിനായി അവർ നിരന്തരം പൊരുതി.
അവസാനം എൺപത്തി ആറാം മിനിറ്റിൽ സോണിലൂടെ വിജയഗോൾ കണ്ടെത്തി. ഈ വിജയത്തോടെ അവർ നാലാം സ്ഥാനത്തേക്ക് ഉയർന്നു. ടോട്ടനത്തിന് 29 മത്സരങ്ങളിൽ നിന്ന് 56 പോയിന്റാണ് ഇപ്പോൾ ഉള്ളത്. ആസ്റ്റൺ വില്ലയ്ക്കും 56 പോയിൻറ് ഉണ്ട് എങ്കിലും അവർ അഞ്ചാം സ്ഥാനത്ത് നിൽക്കുന്നു. ലുട്ടൻ ടൗൺ 22 പോയിന്റുമായി 18ആം സ്ഥാനത്താണ്.