മാഞ്ചസ്റ്റർ യുണൈറ്റഡും റൊണാൾഡോയും തമ്മിലുള്ള ബന്ധങ്ങൾ വഷളാകുന്ന സാഹചര്യത്തിൽ താരം ജനുവരിയോടെ ക്ലബ് വിട്ടേക്കും എന്ന് സൂചന. സ്പർസിന് എതിരായ മത്സരം അവസാനിക്കും മുമ്പ് കളം വിട്ട റൊണാൾഡോയെ ഇന്നലെ മാഞ്ചസ്റ്റർ യുണൈറ്റഡ് ഒരാഴ്ചത്തേക്ക് വിലക്കിയിരുന്നു. റൊണാൾഡോ വിലക്ക് വിഷയത്തിൽ പോസിറ്റീവ് ആയാണ് പ്രസ്താവന നടത്തിയത് എങ്കിലും താരം ഉടൻ തന്നെ ക്ലബ് വിടും എന്നാണ് സൂചന.
ഈ സീസൺ തുടക്കത്തിൽ തന്നെ മാഞ്ചസ്റ്റർ യുണൈറ്റഡ് വിടാൻ റൊണാൾഡോ ശ്രമിച്ചിരുന്നു. ക്ലബും താരത്തെ വിടാൻ ഒരുക്കമായിരുന്നു. എന്നാൽ താരത്തെ വാങ്ങാൻ ഒരു ക്ലബും തയ്യാറായില്ല. ജനുവരിയിൽ റൊണാൾഡോയുടെ കരാർ അവസാനിപ്പിച്ച് ഫ്രീ ആയി റൊണാൾഡോയെ ക്ലബ് വിടാൻ മാഞ്ചസ്റ്റർ യുണൈറ്റഡ് സമ്മതിച്ചേക്കും. ടെൻ ഹാഗിന്റെ പ്ലാനുകളിൽ റൊണാൾഡോക്ക് കാര്യമായ സ്ഥാനവും ഇല്ല. ഈ സീസണിൽ ഇതുവരെ പ്രധാന മത്സരങ്ങളിൽ എല്ലാം റൊണാൾഡോയുടെ സ്ഥാനം ബെഞ്ചിൽ ആയിരുന്നു.
ഫ്രീ ഏജന്റായി റൊണാൾഡോ മാറുക ആണെങ്കിൽ യൂറോപ്പിൽ പ്രമുഖ ക്ലബുകൾ തന്നെ താരത്തെ സ്വന്തമാക്കാൻ രംഗത്ത് ഉണ്ടാകും. കഴിഞ്ഞ സീസണിൽ യുണൈറ്റഡിലേക്ക് മടങ്ങി എത്തിയ റൊണാൾഡോ ആ സീസണിൽ ടീമിന്റെ ടോപ് സ്കോറർ ആയി മാറിയിരുന്നു.