Category: Premier League

മുൻ അത്ലറ്റികോ മാഡ്രിഡ് സ്പോർട്ടിങ് ഡയറക്ടർ ആന്ദ്രയ ബെർറ്റ ആഴ്‌സണൽ സ്പോർട്ടിങ് ഡയറക്ടർ ആവും. 53 കാരനായ ഇറ്റാലിയൻ അടുത്ത ആഴ്ച ആഴ്‌സണലിൽ ഔദ്യോഗിക കരാർ ഒപ്പ് വെക്കും എന്നാണ് റിപ്പോർട്ട്. 2012 ൽ അത്ലറ്റികോ മാഡ്രിഡ് ടെക്നിക്കൽ ഡയറക്ടർ ആയി ക്ലബ്ബിൽ എത്തിയ ബെർറ്റ 2017 ൽ സ്പോർട്ടിങ് മാനേജർ ആയി. ഈ 12 വർഷം രണ്ടാം ഡിവിഷൻ ക്ലബ് ആയ അത്ലറ്റികോയെ അവിസ്മരണീയ നേട്ടങ്ങളിലേക്ക് ആണ് ബെർറ്റയും സിമിയോണിയും ഉയർത്തിയത്. ചില തീരുമാനങ്ങൾ പിഴച്ചു എങ്കിലും മികച്ച താരങ്ങളെ വൻ തുക കൊടുത്തും ചിലപ്പോൾ ചെറിയ തുകക്കും ടീമിൽ എത്തിച്ച ബെർറ്റ സിമിയോണിക്ക് ചരിത്രം എഴുതാൻ വഴി കാണിച്ചു.

2 തവണ ലാ ലീഗ ജേതാക്കൾ ആയ അത്ലറ്റികോ ഈ കാലയളവിൽ 2 തവണ ചാമ്പ്യൻസ് ലീഗ് ഫൈനലും കളിച്ചു. സാമ്പത്തികമായി വളരെ മുമ്പിലുള്ള റയൽ മാഡ്രിഡ്,ബാഴ്‌സലോണ എന്നിവർക്ക് ഒപ്പം അത്ലറ്റികോയെ പിടിച്ചു നിൽക്കാൻ പ്രാപ്തനാക്കിയത് ബെർറ്റ ആയിരുന്നു. തന്റെ അഭിപ്രായം ആർക്ക് വേണ്ടിയും മാറ്റില്ല എന്ന ശീലമുള്ള ബെർറ്റ ലോകത്തിലെ ഏറ്റവും മികച്ച സ്പോർട്ടിങ് ഡയറക്ടർമാരിൽ ഒരാൾ ആയാണ് അറിയപ്പെടുന്നത്. നിരവധി ക്ലബുകൾ അദ്ദേഹത്തിന് ആയി രംഗത്ത് വന്നെങ്കിലും ബെർറ്റ ആഴ്‌സണൽ തിരഞ്ഞെടുക്കുക ആയിരുന്നു. നേരത്തെ സ്ഥാനം ഒഴിഞ്ഞ എഡുവിനു പകരക്കാരനായി ആണ് ബെർറ്റ ആഴ്‌സണലിൽ എത്തുന്നത്. നിലവിൽ ക്ലബിന്റെ ട്രാൻസ്ഫർ നീക്കങ്ങളിൽ ആർട്ടെറ്റക്ക് ഒപ്പം വലിയ പങ്ക് ആവും ബെർറ്റ വഹിക്കുക. മുന്നേറ്റത്തിൽ അടക്കം വലിയ താരങ്ങളെ ലക്ഷ്യം ഇടുന്ന ആഴ്‌സണലിന് ബെർറ്റയുടെ കഴിവുകൾ സഹായകമാവും എന്നുറപ്പാണ്. പുരുഷ ടീമിന് പുറമെ വനിത, അക്കാദമി ടീമുകളുടെയും മികവ് കൂട്ടാൻ ബെർറ്റയുടെ വരവ് സഹായകമാവും.

ബുധനാഴ്ച നോട്ടിംഗ്ഹാം ഫോറസ്റ്റിനോട് 0-0ന്റെ സമനില വഴങ്ങിയതോടെ ആഴ്‌സണലിൻ്റെ പ്രീമിയർ ലീഗ് കിരീട മോഹങ്ങൾ അകന്നു. പ്രധാന ഫോർവേഡുകൾ പരിക്കുമായി മല്ലിടുന്നതിനാൽ സ്ട്രൈക്കർ ഇല്ലാതെ ഇറങ്ങിയ മൈക്കൽ അർട്ടെറ്റയുടെ ടീമിന് ലക്ഷ്യത്തിലേക്ക് ഒരു ഷോട്ട് മാത്രമേ ഇന്ന് തൊടിക്കാൻ ആയുള്ളൂ‌‌..

ആഴ്സണൽ ലീഗിലെ ലീഡർമാരായ ലിവർപൂളിനെക്കാൾ 13 പോയിൻ്റിന് പിന്നിലാണ് ഇപ്പോൾ. മാഞ്ചസ്റ്റർ സിറ്റിക്ക് മുന്നിൽ 48 പോയിന്റുമായി ഫോറസ്റ്റ് പട്ടികയിൽ മൂന്നാം സ്ഥാനത്ത് തുടരുന്നു.

ഈ സീസണിൽ പരിക്കുകൾ നിരന്തരം വേട്ടയാടുന്ന ആഴ്‌സണലിന് വീണ്ടും വമ്പൻ തിരിച്ചടി നൽകി വീണ്ടും പരിക്ക്. മുന്നേറ്റ നിരയിൽ നിലവിൽ ഗബ്രിയേൽ ജീസുസ്, ബുകയോ സാക, ഗബ്രിയേൽ മാർട്ടിനെല്ലി എന്നിവരെ നഷ്ടമായ ആഴ്‌സണലിന് നിലവിൽ കായ് ഹാവർട്‌സിനെ കൂടി നഷ്ടമായിരിക്കുക ആണ്. ദുബായിൽ നടക്കുന്ന ട്രെയിനിങ് സെക്ഷന് ഇടയിൽ ആണ് ഹാവർട്‌സിന് പരിക്കേറ്റത്. ഇനി ഈ സീസണിൽ കായ് ഹാവർട്‌സ് കളിക്കില്ല എന്നു ദ അത്ലറ്റിക് റിപ്പോർട്ടർ ഡേവിഡ് ഓർസ്റ്റെയിൻ റിപ്പോർട്ട് ചെയ്തു.

താരത്തിന്റെ ഹാംസ്ട്രിങ് കീറിയത് ആയാണ് ഓർസ്റ്റെയിൻ റിപ്പോർട്ട് ചെയ്തത്. സീസണിൽ ആഴ്‌സണലിന്റെ ടോപ് സ്‌കോറർ ആണ് കായ്. നിലവിൽ താരത്തിന് ശസ്ത്രക്രിയ വേണമോ എന്നു ഉറപ്പില്ലെങ്കിലും താരം അടുത്ത സീസണിൽ ആരോഗ്യവാനായി തിരിച്ചു വരാൻ ആവും ലക്ഷ്യം വെക്കുക. നിലവിൽ മുന്നേറ്റത്തിൽ പറയാൻ താരങ്ങൾ ആരുമില്ലാത്ത അവസ്‌ഥയിൽ ആണ് ആഴ്‌സണൽ. ജനുവരിയിൽ ആരെയും ഇത്രയും പരിക്കുകൾ വേട്ടയാടിയിട്ടും ടീമിൽ എത്തിക്കാത്ത ആഴ്‌സണൽ ബോർഡിനു വലിയ വിമർശനം ആണ് ആരാധകരിൽ നിന്നു ഉണ്ടാവുന്നത്. നിലവിൽ അക്കാദമിയിലെ യുവതാരങ്ങളെ കളിപ്പിക്കുക എന്നത് മാത്രമാവും പരിശീലകൻ മിഖേൽ ആർട്ടെറ്റയുടെ മുന്നിലുള്ള ഏക വഴി.

എഎഫ്‌സി ബോൺമൗത്തിന്റെ ജസ്റ്റിൻ ക്ലൂയിവർട്ടിന് ജനുവരിയിലെ പ്രീമിയർ ലീഗ് പ്ലെയർ ഓഫ് ദ മന്ത് അവാർഡ് ലഭിച്ചു. ജനുവരി അദ്ദേഹത്തിന് മികച്ച മാസമായിരുന്നു. ജനുവരിയിൽ വെറും നാല് മത്സരങ്ങളിൽ നിന്ന് അഞ്ച് ഗോളുകൾ നേടുകയും രണ്ട് അസിസ്റ്റുകൾ നൽകുകയും ചെയ്ത ഡച്ച് ഫോർവേഡ് ബോൺമൗത്തിന്റെ ആക്രമണത്തിൽ നിർണായക പങ്ക് വഹിച്ചു. അദ്ദേഹത്തിന്റെ അഞ്ച് ഗോളുകളിൽ ന്യൂകാസിലിന് എതിരെ നേടിയ ഹാട്രിക്കും ഉൾപ്പെടുന്നു.