കൊറോണക്കെതിരെ ഒരു മില്ല്യൺ സംഭാവനയുമായി മാഞ്ചസ്റ്റർ സിറ്റി മാനേജർ പെപ്പ് ഗ്വാർഡിയോള രംഗത്ത്. ഒരു മില്യൺ യൂറോയാണ് കൊറോണ വൈറസിനെതിരായ പോരാട്ടത്തിൽ പെപ്പ് ഗ്വാർഡിയോള നൽകുക. പെപ്പിന്റെ സംഭാവന ബാഴ്സലോണയിലേക്കാണ് പോവുക. പെപ്പിന്റെ ജന്മനാടായ കാറ്റലൻ നഗരത്തിലെ മെഡിക്കൽ കോളേജിലേക്കാണ് ഈ തുക നൽകുക. മെഡിക്കൽ കോളേജിനാവശ്യമായ ഉപകരണങ്ങളും ആരോഗ്യപ്രവർത്തകർക്ക് സുരക്ഷാ ഉപകരണങ്ങൾ വാങ്ങാനും ഈ തുക ഉപയോഗിക്കും.
ഇറ്റലിയെ പോലെ തന്നെ കൊറോണ വൈറസ് വളരെ മോശമായി ബാധിച്ച യൂറോപ്പിലെ മറ്റൊരു രാജ്യമാണ് സ്പെയിൻ. ഔദ്യോഗിക കണക്കുകൾ അനുസരിച്ച് ഈ മഹാമാരി കാരണം രണ്ടായിരത്തിലേറെ ആളുകൾ മരിച്ചു കഴിഞ്ഞു. യുവന്റസിന്റെ പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോയും ബാഴ്സയുടെ അർജന്റീനിയൻ സൂപ്പർ താരം ലയണൽ മെസ്സിയും കൊറോണ വിപത്തിനെ നേരിടാൻ ഒരു മില്ല്യൺ യൂറോ വീതം സംഭാവന നൽകിയിരുന്നു.