പെനാൽറ്റി നഷ്ടപ്പെടുത്തി ഒബാമയാങ്, നോർത്ത് ലണ്ടൻ ഡർബി സമനിലയിൽ

ആവേശകരമായ നോർത്ത് ലണ്ടൻ ഡർബി സമനിലയിൽ, അവസാന നിമിഷം ലഭിച്ച പെനാൽറ്റി ആഴ്‌സണൽ താരം ഒബാമയാങ് നഷ്ടപെടുത്തിയപ്പോൾ ടോട്ടൻഹാമിനോട് ഓരോ ഗോൾ വീതം നേടി സമനില പാലിക്കുകയായിരുന്നു. ലീഡ് എടുത്ത ശേഷമാണ് ആഴ്‌സണൽ സമനില വഴങ്ങിയത്. അവസാന നിമിഷം ഡിഫൻസീവ് മിഡ്ഫീൽഡർ ലൂക്കാസ് ടൊറേറ റെഡ് കാർഡ് നേടി പുറത്തായതും ആഴ്‌സണലിന് തിരിച്ചടിയായി.

മത്സരത്തിന്റെ പതിനാറാം മിനിറ്റിൽ തന്നെ സ്പർസ്‌ ലീഡ് എടുത്തിരുന്നു, അറ്റാക്കിങ് ഫുട്ബാൾ കളിച്ചു കളിക്കാർ എല്ലാവരും ആഴ്‍സണലിന്റെ പകുതിയിൽ എത്തിയതാണ് സ്പർസിനു തിരിച്ചടിയായത്. മികച്ചൊരു കൗണ്ടർ അറ്റാക്കിങ് ഫുട്ബാളിലൂടെ ആഴ്‌സണൽ ലീഡ് എടുത്തു. ലകാസെറ്റെ നൽകിയ ലോങ്ങ് പാസ് ക്ലിയർ ചെയ്യുന്നതിൽ സ്പർസ്‌ ഡിഫൻഡർ സാഞ്ചസ് പരാജയപ്പെട്ടപ്പോൾ പന്ത് കൈക്കലാക്കി റാംസി കുതിക്കുകയായിരുന്നു, വൺ ഓൺ വണ്ണിൽ ലോറിസിനെ കീഴടക്കി പന്ത് വലയിൽ. സ്കോർ 0-1.

ആദ്യ പകുതി അവസാനിക്കുന്നതിനു തൊട്ടു മുൻപ് ഒരു മികച്ച ഡബിൾ സേവുമായി ആഴ്‌സണൽ ഗോൾ കീപ്പർ ലെനോ എത്തി, ആദ്യം ക്ലോസ് റേഞ്ചിൽ നിന്നും എറിക്സന്റെയും പിന്നീട് സിസോകോയുടേം ഷോട്ടുകൾ ലെനോ സേവ് ചെയ്തു.

രണ്ടാം പകുതിയിൽ ഇരു ടീമുകളും കൂടുതൽ ആക്രമിച്ചു കളിച്ചപ്പോൾ 74ആം മിനിറ്റിൽ ലഭിച്ച പെനാൽറ്റി ഗോളാക്കി മാറ്റി കെയ്ൻ സ്പർസിനു സമനില സമ്മാനിച്ചു. 90ആം മിനിറ്റിൽ മത്സരം വിജയിക്കാനുള്ള അവസരം ആഴ്‌സണൽ നഷ്ടപ്പെടുത്തി. ഒബാമയങ്ങിനെ വീഴ്ത്തിയതിന് ലഭിച്ച പെനാൽറ്റി ഒബാമയാങ് തന്നെ നഷ്ടപ്പെടുത്തി. ഇതോടെ ലീഗ് ടേബിളില്‍ സ്പര്സിനു തൊട്ടടുത്ത്‌ എത്താനുള്ള അവസരമാണ് ആഴ്സനലിന് നഷ്ടമായത്.