ഇംഗ്ലീഷ് പ്രീമിയർ ലീഗിൽ ന്യൂകാസിൽ യുണൈറ്റഡ് അവസാന നിമിഷ ഗോളിലൂടെ പരാജയത്തിൽ നിന്ന് രക്ഷപ്പെട്ടു. ഇന്ന് സെന്റ് ജെയിംസ് പാർക്കിൽ വെച്ച് ബൗണ്മതിനെ നേരിട്ട ന്യൂകാസിൽ യുണൈറ്റഡ് 2-2 എന്ന സമനില ആണ് വഴങ്ങിയത്. ഇന്ന് രണ്ടാം പകുതിയിലാണ് കളിയിലെ നാലു ഗോളുകളും വന്നത്. 51ആം മിനുട്ടിൽ സോളങ്കി ബൗന്മതിന് ലീഡ് നൽകി. ഇതിന് 58ആം മിനുട്ടിൽ ഒരു പെനാൾട്ടിയിലൂടെ ഗോർദൻ മറുപടി നൽകി. സ്കോർ 1-1.
69ആം മിനുട്ടിൽ സെമന്യോയുടെ ഫിനിഷിൽ ബൗണ്മത് വീണ്ടും ലീഡെടുത്തു. സൊളങ്കിയുടെ പാസിൽ നിന്നായിരുന്നു ഈ ഗോൾ. അവസാനം 90 മിനുട്ടും കഴിഞ്ഞാണ് ന്യൂകാസിൽ സമനില ഗോൾ കണ്ടെത്തിയത്. മാറ്റ് റിച്ചിയാണ് പന്ത് വലയിൽ എത്തിച്ചത്. സ്കോർ 2-2.
ഈ സമനിലയോടെ ന്യൂകാസിൽ യുണൈറ്റഡ് 37 പോയിന്റുമായി ഏഴാം സ്ഥാനത്ത് നിൽക്കുകയാണ്. ബൗണ്മത് 29 പോയിന്റുമായി 13ആം സ്ഥാനത്തും നിൽക്കുന്നു.