വോൾവ്സിൽ നിന്നും പ്രതിരോധ താരം മാറ്റ് ഡോഹെർട്ടിയെ സ്വന്തമാക്കി സ്പർസ്. നാല് വർഷത്തെ കരാറിലാണ് ഡോഹെർട്ടി വോൾവ്സിൽ നിന്നും സ്പർസിൽ എത്തുന്നത്. 28കാരനായ ഡോഹെർട്ടി കഴിഞ്ഞ സീസണിൽ വോൾവ്സിന് വേണ്ടി 50 മത്സരങ്ങളിൽ ബൂട്ട് കെട്ടിയിട്ടുണ്ട്. ട്രാൻസ്ഫർ തുക ഇരു ടീമുകളും വെളിപ്പെടുത്തിയിലെങ്കിലും ഏകദേശം 15 മില്യൺ പൗണ്ടിനാണ് താരം സ്പർസിൽ എത്തിയത് എന്നാണ് കരുതപ്പെടുന്നത്.
സ്പർസിന്റെ ഈ സീസണിലെ മൂന്നാമത്തെ സൈനിങ് ആണ് ഡോഹെർട്ടി. നേരത്തെ കീപ്പർ ജോ ഹാർട്ടിനെയും മിഡ്ഫീൽഡർ ഹോബെർഗിനെയും സ്പർസ് നേരത്തെ സ്വന്തമാക്കിയിരുന്നു. കഴിഞ്ഞ സീസണിൽ പ്രീമിയർ ലീഗിൽ ഏഴാം സ്ഥാനത്ത് സീസൺ അവസാനിപ്പിച്ച വോൾവ്സിന് വേണ്ടി മുഴുവൻ മത്സരങ്ങളും കളിച്ച താരമാണ് ഡോഹെർട്ടി. വോൾവ്സിന് വേണ്ടി 300ൽ അധികം മത്സരങ്ങൾ താരം കളിച്ചിട്ടുണ്ട്. ഡോഹെർട്ടിയുടെ ട്രാൻസ്ഫർ പൂർത്തിയായതോടെ പ്രതിരോധ താരം സെർജ് ഓറിയർ ടീം വിടുമെന്നാണ് കരുതപ്പെടുന്നത്.