പൊരുതി നിന്ന ബ്രൈറ്റനെ ഏകപക്ഷീയമായ ഒരു ഗോളിന് തോൽപ്പിച്ച് ലിവർപൂൾ. ആദ്യ പകുതിയിൽ മുഹമ്മദ് സല നേടിയ ഗോളാണ് ലിവർപൂളിന് ജയം നേടി കൊടുത്തത്. മത്സരം അവസാനിക്കാൻ മിനുട്ടുകൾ മാത്രം ബാക്കി നിൽക്കെ ഗോളെന്ന് ഉറച്ച അവസരം രക്ഷപ്പെടുത്തിയ ലിവർപൂൾ ഗോൾ കീപ്പർ അലിസണിന്റെ പ്രകടനവും ലിവർപൂളിന്റെ രക്ഷക്കെത്തി. ജയത്തോടെ ഇതുവരെ കളിച്ച മൂന്ന് മത്സരങ്ങളും ജയിച്ച ലിവർപൂൾ പോയിന്റ് പട്ടികയിൽ ഒന്നാമതാണ്.
ആദ്യ പകുതിയിൽ ബ്രൈറ്റൻ പ്രതിരോധം വരുത്തിയ പിഴവാണ് ഗോളിൽ കലാശിച്ചത്. ബീസൂമയുടെ മോശം പാസ് പിടിച്ചെടുത്ത മിൽനർ തുടങ്ങിയ ആക്രമണം ഫിർമിനോയുടെ പാസിൽ മുഹമ്മദ് സല ഗോളകുകയായിരുന്നു. തുടർന്നും ഇരു ടീമുകളും ഗോൾ നേടാൻ പരിശ്രമിച്ചെങ്കിലും ഗോൾ മാത്രം വിട്ടു നിന്നു. അവസാന മിനുട്ടിൽ അലിസണിന്റെ മികച്ച രക്ഷപെടുത്തലും ലിവർപൂളിന്റെ രക്ഷക്കെത്തിയതോടെ മത്സരത്തിൽ ലിവർപൂൾ ജയം ഉറപ്പിക്കുകയായിരുന്നു.