ഇഞ്ചുറി ടൈം വിന്നറിൽ ലെസ്റ്ററിനെ വീഴ്ത്തി വോൾവ്സ്

- Advertisement -

പ്രീമിയർ ലീഗിൽ ഇഞ്ചുറി ടൈമിൽ നേടിയ ഗോളിൽ വിജയം സ്വന്തമാക്കി വോൾവ്സ്. 4-3 എന്ന സ്കോറിനാണ് അവർ ലെസ്റ്ററിനെ മറികടന്നത്. രണ്ട് ഗോളുകൾക്ക് പിറകിൽ പോയ ശേഷം സ്കോർ രണ്ട് തവണ സമനില ആക്കിയ ലെസ്റ്ററിന് കടുത്ത നിരാശ സമ്മാനിക്കുന്ന മത്സര ഫലമായി ഇന്നത്തേത്. ജയത്തോടെ ലീഗിൽ എട്ടാം സ്ഥാനത്താണ് വോൾവ്സ്.

സ്‌ട്രൈക്കർ ഡിയഗോ ജോട്ട നേടിയ ഹാട്രിക്കാണ് എസ്‌പെരിട്ടോ സാന്റോയുടെ ടീമിന് വിലപ്പെട്ട 3 പോയിന്റ് സമ്മാനിച്ചത്. ആദ്യ പകുതിയിൽ 12 മിനുട്ടിനുള്ളിൽ ജോട്ട, റയാൻ ബെന്നറ്റ് എന്നിവർ നേടിയ ഗോളുകൾക്ക് വോൾവ്സ് മുന്നിട്ട് നിന്നു. പക്ഷെ രണ്ടാം പകുതിയിൽ അതി ശക്തമായ തിരിച്ചു വരാവാണ് ലെസ്റ്റർ നടത്തിയത്. മത്സരം ഒരു മണിക്കൂർ പിന്നീടും മുൻപേ ലെസ്റ്റർ ഗ്രെ, കോഡിയുടെ സെൽഫ് ഗോൾ എന്നിവയിലൂടെ മത്സരം സമനിലയിലാക്കി.

64 ആം മിനുട്ടിലാണ് ജോട്ട വീണ്ടും വല കുലുക്കി വോൾവ്സ് ലീഡ് നേടിയത്. പക്ഷെ 87 ആം മിനുട്ടിൽ ക്യാപ്റ്റൻ വെസ് മോർഗൻ ലെസ്റ്ററിനായി ഗോൾ നേടിയതോടെ സ്കോർ 3-3. മത്സരം സമനിലയിൽ അവസാനിക്കും എന്ന ഘട്ടത്തിൽ 93 ആം മിനുട്ടിൽ ജോട്ട ഹാട്രിക് തികച്ച ഗോൾ നേടി ജയം സ്വന്തമാക്കിയത്.

Advertisement