പുതിയ പരിശീലകനെ തേടിയുള്ള ടോട്ടൻഹാം ഹോട്സ്പറിന്റെ തിരച്ചിൽ തുടരുന്നു. ഫിയോന്റീന പരിശീലക സ്ഥാനം ഒഴിഞ്ഞ ഗട്ടൂസോയെ സ്വന്തമാക്കാനുള്ള സ്പർസിന്റെ ശ്രമങ്ങൾ നടക്കില്ലെന്ന് ഉറപ്പായതോടെയാണ് പുതിയ പരിശീലകനായുള്ള തിരച്ചിൽ സ്പർസ് തുടങ്ങിയത്. നേരത്തെ മുൻ റോമാ പരിശീലകനായിരുന്ന പൗള ഫോനെസ്ക ടോട്ടൻഹാം പരിശീലകനാവുമെന്ന് കരുതപ്പെട്ടെങ്കിലും അവസാന നിമിഷം ഫോനെസ്കയും ടോട്ടൻഹാമും തമ്മിലുള്ള ചർച്ചകൾ അലസുകയായിരുന്നു.
തുടർന്നാണ് ഗട്ടൂസോയെ സ്വന്തമാക്കാൻ സ്പർസ് ശ്രമം ആരംഭിച്ചത്. എന്നാൽ സോഷ്യൽ മീഡിയയിൽ ഗട്ടൂസോയെ പരിശീലകനായി നിയമിക്കുന്നതിനെതിരെ പ്രതിഷേധം ഉടലെടുത്തതോടെയാണ് ഗട്ടൂസോക്ക് പകരം മറ്റൊരാളെ കണ്ടെത്താനുള്ള ശ്രമം സ്പർസ് ആരംഭിച്ചത്. ഫിയോന്റീന പരിശീലകനായി 22 ദിവസം കഴിഞ്ഞതിന് പിന്നാലെയാണ് ക്ലബ് ഉടമകളുമായുള്ള പ്രശ്നങ്ങളെ തുടർന്ന് ഗട്ടൂസോ പരിശീലക സ്ഥാനം ഒഴിഞ്ഞത്. നേരത്തെ മുൻ ചെൽസി പരിശീലകനായിരുന്ന അന്റോണിയോ കൊണ്ടേയെയും പരിശീലകനായി എത്തിക്കാൻ സ്പർസ് ശ്രമം നടന്നെങ്കിലും ചർച്ചകൾ വിജയത്തിൽ എത്തിയിരുന്നില്ല.
