ഇംഗ്ലീഷ് പ്രീമിയർ ലീഗിൽ ഫുൾഹാം ക്രിസ്റ്റൽ പാലസ് ലണ്ടൻ ഡാർബി 2-2 സമനിലയിൽ പിരിഞ്ഞു. തുല്യശക്തികൾ തമ്മിലുള്ള പോരാട്ടത്തിൽ പാലസ് ആണ് ആദ്യം മുന്നിൽ എത്തിയത്. 34 മത്തെ മിനിറ്റിൽ എസെയുടെ പാസിൽ നിന്നു എഡാർഡ് ആണ് അവർക്ക് ആയി ഗോൾ നേടിയത്. കൗണ്ടർ അറ്റാക്കിൽ നിന്നാണ് ഈ ഗോൾ പിറന്നത്. എന്നാൽ ആദ്യ പകുതിയുടെ അവസാന സെക്കന്റിൽ വിൽസനെ മിച്ചൽ വീഴ്ത്തിയതിനു ലഭിച്ച പെനാൽട്ടി ലക്ഷ്യം കണ്ട അലക്സാണ്ടർ മിട്രോവിച് ഫുൾഹാമിനു ആയി സമനില ഗോൾ നേടി.
രണ്ടാം പകുതിയിൽ 61 മത്തെ മിനിറ്റിൽ വില്യമിന്റെ ക്രോസിൽ നിന്നു ഉഗ്രൻ ഹെഡറിലൂടെ തന്റെ രണ്ടാം ഗോൾ കണ്ടത്തിയ മിട്രോവിച് ഫുൾഹാമിനെ മത്സരത്തിൽ മുന്നിൽ എത്തിച്ചു. 8 മത്സരങ്ങളുടെ വിലക്ക് കഴിഞ്ഞു വന്ന മിട്രോവിച് കഴിഞ്ഞ രണ്ടു കളികളിൽ നിന്നു നേടുന്ന മൂന്നാം ഗോൾ ആയിരുന്നു ഇത്. ഫുൾഹാമിന്റെ തിരിച്ചു വരവ് ജയം കാണും എന്നു വിചാരിച്ച സമയത്ത് 83 മത്തെ മിനിറ്റിൽ ഗോൾ നേടിയ ജോവൽ വാർഡ് പാലസിന് സമനില ഗോൾ സമ്മാനിച്ചു. നിലവിൽ ഒരു മത്സരം മാത്രം ലീഗിൽ ബാക്കിയുള്ളപ്പോൾ പാലസ് 11 മതും ഫുൾഹാം പത്താം സ്ഥാനത്തും ആണ്.