ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ സിറ്റിയുടെ കുതിപ്പ് തുടരുന്നു. വെംബ്ലിയിൽ ഇന്നലെ നടന്ന മത്സരത്തിൽ എതിരില്ലാത്ത ഒരു ഗോളിനാണ് സിറ്റി ജയിച്ചു കയറിയത്. റിയാദ് മഹ്റസ് നേടിയ ഗോളാണ് മത്സര ഫലം നിർണയിച്ചത്. ജയത്തോടെ 26 പോയിന്റുള്ള സിറ്റി ലീഗിൽ ഒന്നാം സ്ഥാനത്താണ്. ലിവർപൂളിനും 26 പോയിന്റ് ഉണ്ടെങ്കിലും മികച്ച ഗോൾ ശരാശരിയുടെ അടിസ്ഥാനത്തിൽ സിറ്റി ഒന്നാമതായി.
മത്സര തുടക്കത്തിൽ തന്നെ സിറ്റി ലീഡ് എടുത്തിരുന്നു. ആറാം മിനുട്ടിൽ റഹീം സ്റ്റർലിംഗിന്റെ പസിൽ നിന്നാണ് മഹ്റസ് ഗോൾ നേടിയത്. ഗോൾ വഴങ്ങിയതോടെ സ്പർസ് കെയ്ൻ, ആൾഡർവീൽഡ് എന്നിവരിലൂടെ ശ്രമങ്ങൾ നടത്തിയെങ്കിലും ഗോളാലായില്ല. രണ്ടാം പകുതിയിൽ സ്പർസിന് കാര്യമായി ഒന്നും ചെയ്യാനായില്ല. സിറ്റിയുടെ പഴുതടച്ച പ്രതിരോധത്തിന് അവർക്ക് മറുപടി ഉണ്ടായിരുന്നില്ല. വൻ തോൽവി ഒഴിവാക്കാനായി എന്നതിലപ്പുറം മത്സരത്തിൽ നിന്ന് സ്പർസിന് കാര്യമായി ഒന്നും ചെയ്യാനായില്ല.