തുടർച്ചയായ രണ്ട് തോൽവികൾക്ക് ശേഷം വിജയവഴിയിൽ തിരിച്ചെത്തി ചെൽസി. പൊരുതി നിന്ന വെസ്റ്റ്ഹാമിനെ ഏകപക്ഷീയമായ മൂന്ന് ഗോളിന് തോൽപ്പിച്ചാണ് ചെൽസി ജയം സ്വന്തമാക്കിയത്. എന്നാൽ സ്കോർ നില സൂചിപ്പിക്കുംപോലെ ചെൽസിക്ക് കാര്യങ്ങൾ എളുപ്പമായിരുന്നില്ല. ചെൽസിക്കൊപ്പം പൊരുതിയെ വെസ്റ്റ്ഹാം പലപ്പോഴും ചെൽസി ഗോൾ മുഖം വിറപ്പിക്കുകയും ചെയ്തു. എന്നാൽ രണ്ടാം പകുതിയിൽ തൊട്ടടുത്ത മിനിറ്റുകളിൽ ടാമി അബ്രഹാം നേടിയ രണ്ട് ഗോളുകളാണ് മത്സരം വെസ്റ്റ്ഹാമിൽ നിന്ന് ചെൽസി കൈക്കലാക്കിയത്.
ആദ്യ പകുതിയിൽ മേസൺ മൗണ്ടിന്റെ കോർണറിൽ നിന്ന് തിയാഗോ സിൽവയാണ് ചെൽസിക്ക് വേണ്ടി ഗോൾ നേടിയത്. എന്നാൽ ഗോൾ നേടിയതിന് ശേഷം മത്സരത്തിൽ കാര്യമായ അവസരങ്ങൾ സൃഷ്ട്ടിക്കാൻ ചെൽസിക്കായിരുന്നില്ല. തുടർന്നാണ് രണ്ടാം പകുതിയിൽ തൊട്ടടുത്ത മിനിറ്റുകളിൽ ഇരട്ട ഗോളുകൾ നേടി ടാമി അബ്രഹാം ചെൽസിയുടെ വിജയം ഉറപ്പിച്ചത്. ജയത്തോടെ പോയിന്റ് പട്ടികയിൽ അഞ്ചാം സ്ഥാനത്ത് എത്താനും ചെൽസിക്കായി.