ഇന്നലെ ന്യൂകാസിൽ ആഴ്സണൽ മത്സരത്തിൽ പിറന്ന ഗോൾ ഒരു വിധത്തിലും ഗോൾ അല്ല എന്ന് ആഴ്സണൽ പരിശീലകൻ അർട്ടേറ്റ. ഇന്നലെ ഏക ഗോളിനായിരുന്നു ന്യൂകാസിൽ വിജയിച്ചിരുന്നത്. ആ ഗോൾ ആകട്ടെ വിവാദ ഗോളുമായിരുന്നു. ഗോർദൻ നേടിയ ഗോൾ മൂന്ന് വിധത്തിലുള്ള വാർ പരിശോധനക്ക് ആണ് വിധേയമായത്. പന്ത് കോർണർ ലൈൻ കഴിഞ്ഞു പുറത്തു പോയിരുന്നോ? ഗോളിന് മുമ്പ് ഫൗൾ നടന്നിരുന്നോ? ഗോളിൽ ഓഫ് സൈഡ് ഉണ്ടോ?.
ഈ മൂന്ന് പരിശോധനകളും കഴിഞ്ഞ് ഗോൾ എന്ന് വാർ വിധിച്ചു. നീണ്ട സമയത്തെ പരിശോധനക്ക് ശേഷമായിരുന്നു ഈ വിധിം അർട്ടേറ്റ മത്സര ശേഷം കടുത്ത ഭാഷയിൽ റഗറിയിംഗിനെ വിമർശിച്ചു. “ഫലം എന്തായിരിക്കരുതോ അതാണ് നടന്നത്. ഇത് നാണക്കേടാണ്, ”ബിബിസിയോട് അർട്ടേറ്റ പറഞ്ഞു.
“സംഭവിച്ചത് ലജ്ജാകരമാണ്. പ്രീമിയർ ലീഗിൽ ഈ ഗോൾ എങ്ങനെ അനുവദിക്കപ്പെടുന്നു? ഈ ലീഗ് ലോകത്തിലെ ഏറ്റവും മികച്ചതാണെന്ന് ഞങ്ങൾ പറയുന്നു. എന്നിട്ടും ഇതാണ് നടക്കുന്നത്. ഞാൻ ഈ നാട്ടിൽ 20 വർഷമായി നിൽക്കുന്നു, ഇപ്പോൾ എനിക്ക് ലജ്ജ തോന്നുന്നു.” അർട്ടേറ്റ പറഞ്ഞു. ഇന്നലത്തെ പരാജയം ആഴ്സണലിന്റെ ലീഗിലെ ആദ്യ പരാജയമായിരുന്നു.