പ്രീമിയർ ലീഗ് കിരീടം ലക്ഷ്യവെച്ച് ഇറങ്ങുന്ന ജോസെ മൗറിനോയുടെ ടോട്ടൻഹാമിന് വമ്പൻ തിരിച്ചടി. കഴിഞ്ഞ ട്രാൻസ്ഫർ വിൻഡോയിൽ റയൽ മാഡ്രിഡിൽ നിന്ന് ടോട്ടൻഹാമിൽ എത്തിയ ഗാരെത് ബെയ്ലിന് പരിക്ക്. കഴിഞ്ഞ ദിവസം കാരബാവോ കപ്പിൽ സ്റ്റോക്ക് സിറ്റിക്കെതിരായ മത്സരത്തിനിടെയാണ് താരത്തിന് പരിക്കേറ്റത്. പരിക്കേറ്റതോടെ താരത്തിന് ടോട്ടൻഹാമിന്റെ അടുത്ത നാല് മത്സരങ്ങൾ നഷ്ടമാവുമെന്നാണ് കരുതപ്പെടുന്നത്.
റയൽ മാഡ്രിഡിൽ നിന്ന് എത്തിയത് മുതൽ ടോട്ടൻഹാമിന്റെ ആദ്യ ഇലവനിൽ സ്ഥിര സാന്നിദ്ധ്യമാവാൻ കഴിയാതെ പോയ ഗാരെത് ബെയ്ലിന് പരിക്ക് വമ്പൻ തിരിച്ചടിയാണ്. റയൽ മാഡ്രിഡിൽ നിന്ന് ടോട്ടൻഹാൻഹാമിൽ എത്തിയിരുന്നെങ്കിലും കാൽമുട്ടിനേറ്റ പരിക്ക് മൂലം താരം ദീർഘ കാലം പുറത്തായിരുന്നു. തുടർന്ന് ടോട്ടൻഹാമിന് വേണ്ടി യൂറോപ്പ ലീഗ് മത്സരങ്ങളിലാണ് താരം കൂടുതൽ കളിച്ചത്. നിലവിൽ ഒരു പ്രീമിയർ ലീഗ് മത്സരത്തിൽ മാത്രമാണ് ഗാരെത് ബെയ്ൽ ടോട്ടൻഹാമിന്റെ ആദ്യ ഇലവനിൽ എത്തിയത്.