പോൾ പോഗ്ബക്ക് കാര്യങ്ങൾ ഒന്നും നേർ വഴിക്കാവുന്നില്ല. പരിക്ക് മാറി എത്തിയ പോഗ്ബ ഇപ്പോൾ യുവന്റസിൽ അച്ചടക്ക നടപടി നേരിടുകയാണ്. ഇന്ന് ഫ്രൈബർഗിനെതിരായ യൂറോപ്പ ലീഗ് മത്സരത്തിൽ നിന്ന് യുവന്റസ് മിഡ്ഫീൽഡർ പോൾ പോഗ്ബയെ അലെഗ്രി ഒഴിവാക്കി. ഫെബ്രുവരി 28 ന് പോഗ്ബ പരിക്ക് മാറി ഏറെ നാളായി കാത്തിരുന്ന യുവന്റസിലെ രണ്ടാം അരങ്ങേറ്റം നടത്തിയിരുന്നു. അതിനു പിന്നാലെയാണ് പുതിയ സംഭവങ്ങൾ.
റിപ്പോർട്ടുകൾ പ്രകാരം, ടീം പരിശീലനത്തിന് പോഗ്ബ വൈകിയാണ് എത്തിയത്. ഇതാണ് അച്ചടക്ക നടപടിയുടെ കാരണം. തൽഫലമായി, യൂറോപ്പ ലീഗ് മത്സരത്തിനുള്ള ടീമിന്റെ ഭാഗമാകില്ല. യുവന്റസിനായി പോഗ്ബ തിരിച്ചെത്തിയതിൽ സന്തോഷിച്ചവർക്ക് നിരാശ നൽകുന്നതാണ് ഈ വാർത്ത.