കേരളത്തിന്റെ ഫുട്ബോൾ ടീമിന് നിരാശ. ദേശീയ ഗെയിംസിൽ ഇന്ന് ഗോവയിൽ സെമി ഫൈനൽ കളിക്കാൻ ഇറങ്ങിയ കേരളം സർവീസസിനോട് പരാജയപ്പെട്ടു. സർവീസിൽ നിന്ന് കനത്ത പരാജയമാണ് കേരളം ഏറ്റുവാങ്ങിയത്. രണ്ടിനെതിരെ നാലു ഗോളുകൾക്ക് ആയിരുന്നു സർവീസസിന്റെ വിജയം. സർവീസസ് ഫൈനലിലേക്ക് മുന്നേറി.
സ്വർണ്ണ പ്രതീക്ഷ അവസാനിച്ച കേരളം ഇനി വെങ്കലത്തിനായി പോരാടും. സന്തോഷ് ട്രോഫി ആദ്യ റൗണ്ടിൽ ഇറങ്ങിയ ശക്തമായ ടീമും ആയാണ് കേരളം ദേശീയ ഗെയിംസിന് എത്തിയത്. എന്നാൽ സന്തോഷ് ട്രോഫിയിൽ എന്നത് പോലെ തന്നെ ദേശീയ ഗെയിംസിലും കേരളം ആധിപത്യം പുലർത്തുന്ന പ്രകടനങ്ങൾ നടത്തിയില്ല. സന്തോഷ് ട്രോഫി ഫൈനൽ റൗണ്ടിന് മുമ്പ് ടീമിൽ ഒരുപാട് കാര്യങ്ങൾ മെച്ചപ്പെടാനുണ്ട് എന്ന സൂചന കൂടിയാണ് ഇന്നത്തെ പരാജയം.